Eknath Shinde Shivsena Demands: राज्य निवडणूक आयोगाने पत्रकार परिषदेत राज्यातील 29 महानगरपालिकांच्या निवडणुकांचा कार्यक्रम जाहीर केला आहे. यामध्ये मुंबई महानगरपालिकेचाही समावेश आहे. 15 जानेवारी रोजी मतदान होणार असून 16 जानेवारीला मतमोजणी होईल. निवडणुकीची घोषणा होताच मुंबई महापालिका जिंकण्यासाठी सत्ताधारी महायुती सक्रिय झाली आहे. भाजप आणि मुख्यमंत्री एकनाथ शिंदे यांच्या शिवसेनेमध्ये जागा वाटपावर चर्चा सुरू असून, यासंदर्भात एक महत्त्वाची माहिती समोर आली आहे.

सूत्रांनी दिलेल्या माहितीनुसार, शिंदे गटाने मुंबई महापालिकेत किमान 125 जागांची मागणी केली आहे. यापेक्षा कमी जागा मिळाल्यास पक्षासाठी अडचणी वाढू शकतात, अशी भूमिका शिंदे गटाकडून मांडली जात आहे.

काय घडले नेमके?

16 डिसेंबर रोजी दादरमधील वसंत स्मृती कार्यालयात शिवसेनेची बैठक पार पडली. या बैठकीत पक्षाच्या नेत्यांनी 125 जागांवर दावा केला. 2017 च्या महापालिका निवडणुकीत शिवसेनेचे 88 नगरसेवक निवडून आले होते आणि ते सर्व धनुष्यबाण चिन्हावर निवडून आले होते. त्यामुळे त्या सर्व जागांवर शिवसेनेचाच हक्क असल्याचा दावा शिंदे गटाकडून करण्यात आला आहे.

125 जागांवर ठाम भूमिका

शिंदे गटाने असेही स्पष्ट केले आहे की, 2017 मध्ये भाजपाने जिंकलेल्या 82 जागा या भाजपकडेच राहाव्यात. उर्वरित जागांबाबत दोन्ही पक्षांनी चर्चा करून तोडगा काढावा, असा प्रस्ताव शिवसेनेने ठेवला आहे. मात्र, 100 पेक्षा कमी जागा स्वीकारणे शिवसेनेसाठी नुकसानकारक ठरेल, त्यामुळे 125 जागांवर पक्ष ठाम असल्याचे सूत्रांचे म्हणणे आहे.

भाजप काय निर्णय घेणार?

मुंबई महापालिका जिंकण्यासाठी भाजप आणि शिंदे गट दोघेही जोरदार तयारी करत आहेत. दुसरीकडे ठाकरे गट देखील पूर्ण ताकदीने मैदानात उतरणार आहे. अशा परिस्थितीत शिंदे गटाने आपली भूमिका स्पष्ट केली असून, यावर भाजप काय निर्णय घेणार याकडे सर्वांचे लक्ष लागले आहे. लवकरच जागावाटपावर दोन्ही पक्षांमध्ये अंतिम निर्णय होईल, अशी शक्यता वर्तवली जात आहे.