दिल्लीतील लाल किल्ल्याजवळ झालेल्या कार बॉम्बस्फोटानंतर केंद्रीय गृहमंत्री अमित शहा यांनी गुरुवारी सकाळी एक महत्त्वाची आपत्कालीन बैठक घेतली. गृहमंत्रालय आणि गुप्तचर यंत्रणांच्या वरिष्ठ अधिकाऱ्यांच्या उपस्थितीत झालेल्या या बैठकीत हल्ल्याच्या तपासाची प्रगती आणि राष्ट्रीय सुरक्षा परिस्थितीचा सविस्तर आढावा घेण्यात आला.
या बैठकीला NIAचे महासंचालक, गुप्तचर विभाग प्रमुख, गृहसचिव आणि दिल्ली पोलिस आयुक्त उपस्थित होते. अधिकाऱ्यांनी दिल्लीसह देशातील प्रमुख शहरांतील सध्याची सुरक्षा स्थिती आणि तपासाचे तपशील गृहमंत्र्यांसमोर मांडले. शहा यांनी सर्व संवेदनशील भागांमध्ये कडक सुरक्षा उपाय राबवण्याचे आणि सतर्कता वाढवण्याचे निर्देश दिले.
दरम्यान, वाढलेल्या सुरक्षा परिस्थितीमुळे अमित शहा यांनी अहमदाबाद आणि मेहसाणा येथील नियोजित दौरे रद्द केले आहेत. ते फूड फेस्टिव्हल आणि आंतरराष्ट्रीय पुस्तक महोत्सवाच्या कार्यक्रमांना व्हिडिओ कॉन्फरन्सिंगद्वारे उपस्थित राहू शकतात अशी माहिती भाजप नेते बिमल जोशी यांनी दिली.
लाल किल्ल्याजवळ सोमवारी संध्याकाळी झालेल्या स्फोटात किमान 12 जणांचा मृत्यू तर अनेकजण जखमी झाले. घटनेनंतर अमित शहा यांनी तत्काळ घटनास्थळी भेट देऊन तपास जलद गतीने करण्याचे निर्देश दिले होते. त्यानंतरही त्यांनी सलग दोन सुरक्षा पुनरावलोकन बैठकांचे आयोजन करून स्थितीचा बारकाईने आढावा घेतला आहे.