जालना - छत्रपती संभाजीनगर महामार्गावर एका खासगी बसचा भीषण झाला आहे. या अपघातात 16 प्रवासी जखमी झाले असून त्यापैकी ४ जण गंभीर जखमी असल्याचं सांगितलं जात आहे. हा अपघात काल मध्यरात्रीच्या सुमारास झाला आहे.

पुण्याहून नागपूरकडे जाणारी खासगी ट्रॅव्हल्स जालन्यातील मात्रेवाडी येथील एका लहान पुलावर आली. तेवढ्यात मागून येणाऱ्या एका वाहानाला साईड देण्यासाठी चालकानं बस पुलाच्या बाजूला घेण्याचा प्रयत्न केला. पण याच प्रयत्नात चालकाचं नियंत्रण सुटलं आणि बस थेट पुलावरुन खाली कोसळली. बस पुलावरून 7 ते 8 फूट खाली कोसळली. मात्र, या भीषण अपघातात बसमधील २५ प्रवासी जखमी झाल्याची माहिती आहे. अपघातग्रस्त बस पूजा ट्रॅव्हल्स कंपनीची असल्याची माहिती समोर आली आहे.

या अपघाताची माहिती मिळताच बदनापूर व जालना पोलिसांनी घटनास्थळी धाव घेतली. त्यानंतर जखमींना उपचारासाठी जिल्हा सामान्य रुग्णालयात दाखल करण्यात आलं. यामध्ये २५ प्रवाशी जखमी झाले असून ४ जण गंभीर जखमी असल्याची माहिती पोलिसांनी दिली आहे. या प्रकरणी पोलीस अधिक तपास करत आहेत.