राष्ट्रवादी काँग्रेसचे अध्यक्ष शरद पवार यांनी नुकतीच बीडमध्ये सभा घेतली. त्यानंतर उपमुख्यमंत्री अजित पवार यांची सभा बीडमध्ये पार पडली. यावेळी मंत्री हसन मुश्रीफ यांनी जितेंद्र आव्हाडाबाबत गौप्यस्फोट केला आहे.
जितेंद्र आव्हाड हा भेकड माणूस आहे. त्यांच्यावर गुन्हा दाखल झाला, त्यावेळी देवेंद्र फडणवीस यांच्या पाया पडला होता आणि निवडणूक न लढण्याबाबत बोलला होता. एक गुन्हा दाखल झाला त्यामुळे असं वागला होता”, असे मुश्रीफ म्हणाले आहेत.
मुश्रीफ म्हणाले की, जयंत पाटील यांनी मला एक थक्क करणारे वक्तव्य सांगितले होते. एकदा ठाण्यात जितेंद्र आव्हाड यांच्यावर गुन्हा दाखल झाला होता. त्यावेळी अजित पवार विरोधी पक्षनेते होते. दरम्यान यावेळी जयंत पाटील आणि अजित दादांना घेऊन आव्हाड अध्यक्षांच्या दालनात गेले होते. यावेळी तिथे तत्कालीन गृहमंत्री देवेंद्र फडणवीस देखील उपस्थित होते. यावेळी आव्हाड यांनी फडणवीस यांचे पाया पडले आणि सांगितले की विधानसभा निवडणूक लढवणार नाही. असा भेकड माणूस शरद पवारांच्या समोर वक्तव्य करतो आणि ते ऐकतात याचे आश्चर्य वाटते, असे हसन मुश्रीफ म्हणाले.