आपण नखांकडे फक्त सौंदर्याच्या दृष्टीने पाहतो. नेलपॉलिश, डिझाइन, कापणे एवढंच लक्षात घेतो. पण खरं सांगायचं तर नखे आपल्या शरीरातील आरोग्याचे संकेत देतात. शरीरात काही गडबड सुरू असेल तर त्याचे पहिले संकेत नखांवर दिसू शकतात. डॉक्टरांच्या मते, हृदय, फुफ्फुसे, यकृत, थायरॉईड, मधुमेह किंवा कधी कधी कर्करोगासारख्या आजारांची सुरुवात नखांमधील बदलांपासून होते. त्यामुळे नखांचा रंग, जाडी किंवा आकार बदलल्यास दुर्लक्ष करू नका.
नखे पिवळी पडत असतील तर बुरशीजन्य संसर्ग असू शकतो. काही वेळा थायरॉईड, मधुमेह किंवा फुफ्फुसांच्या आजाराचाही इशारा असतो.
नखांवर छोटे पांढरे डाग दिसणे सामान्य असले तरी ते वारंवार दिसत असतील तर शरीरात पोषणतत्त्वांची कमतरता किंवा औषधांचा दुष्परिणाम असू शकतो.
नखे निळी दिसत असतील तर शरीराला पुरेसा ऑक्सिजन मिळत नाही याचा संकेत असू शकतो. हृदय किंवा फुफ्फुसांच्या तक्रारीकडे लक्ष द्या.
नखांच्या मुळाशी असलेला अर्धचंद्र लालसर दिसत असल्यास तो हृदयविकार, संधिवात किंवा ल्युपससारख्या आजाराशी संबंधित असू शकतो.
नखांच्या आजूबाजूची त्वचा सुजलेली व दुखरी असल्यास संसर्ग किंवा एलर्जी कारणीभूत असू शकते. वेळेवर उपचार गरजेचे.