मुंबई : शिवसेना विरुद्ध राणा वादात आता पुन्हा एक नवा ट्विस्ट निर्माण झाला आहे. नवनीत राणा (Navneet Rana) यांना भायखळा तुरुंगातून बाहेर येताच लीलावती रुग्णालयात (Lilavati Hospital) दाखल करण्यात आलं होतं. त्यावेळी नवणीत राणांचा व्हायरल झालेला फोटो वादाचं कारण ठरला होता. एम.आर.आय स्कॅन रुम मधील राणांच्या फोटोवरुन शिवसेनेने (Shivsena) लीलावती रुग्णालय प्रशासनाला धारेवर धरलं होतं. त्यानंतर आता या प्रकरणात एका कर्मचाऱ्यावर कारवाई करण्यात आली आहे.
मुंबईच्या माजी महापौर किशोरी पेडणेकर आणि शिवसेना आमदार मनिषा कायंदे या लीलावतीमध्ये पोहोचल्या होत्या. स्कॅन रुममध्ये अशा पद्धतीनं फोटोग्राफी का करु दिली असा सवाल पेडणेकर आणि कायंदे यांनी केला होता. त्यानंतर आता एका कर्मचाऱ्यावर कारवाई करण्यात आली आहे. त्यावरुन आता भाजपने आक्रमक पवित्रा घेतला आहे. शिवसेनेच्या दबावामुळे लीलावती हॉस्पिटलचे सुरक्षा प्रमुख पराग जोशी यांना हॉस्पिटल प्रशासनाने बडतर्फ केलं असा आरोप भाजपकडून करण्यात आला आहे.
भाजपचे आमदार अतुल भातखळकर यांनी या मुद्दयावर बोलताना, शिवसेनेच्या दबावामुळे लीलावती हॉस्पिटलचे सुरक्षा प्रमुख पराग जोशी यांना हॉस्पिटल प्रशासनाने बडतर्फ केलं असा आरोप केला, पराग जोशी यांचा गुन्हा काय? मराठी माणसावर ठाकरे सरकारकडून सातत्याने अन्याय होतोय...पराग जोशी यांच्या पत्नीला न्याय हवा आहे असं अतुल भातखळकर म्हणाले.
किरीट सोमय्यांनी देखील यावरुन ठाकरे सरकारला घेरलं आहे. "शिवसेनेची धमकी, सुरक्षा प्रभारी पराग जोशी यांना रुग्णालय व्यवस्थापनाने बडतर्फ केले. ऐसी दादागिरी नाही चलेगी" असं किरीट सोमय्या म्हणाले आहेत.