उत्तराखंडमध्ये पुन्हा एकदा भूस्खलनामुळे मोठी दुर्घटना घडली असून, पिथोरागड जिल्ह्यातील धौलीगंगा वीज प्रकल्पाच्या आपत्कालीन बोगद्यात एनएचपीसीचे तब्बल १९ कर्मचारी अडकले आहेत. मुसळधार पावसामुळे झालेल्या या भूस्खलनामुळे पॉवर हाऊसकडे जाणारा मार्ग पूर्णपणे बंद झाला असून मोठ्या प्रमाणात चिखल व दगड साचल्याने बचावकार्य अडथळ्यात आले आहे.
धारचुलाजवळील इलागड परिसरात असलेल्या धौलीगंगा वीज प्रकल्पाच्या सामान्य आणि आपत्कालीन बोगद्यांकडे जाणारा रस्ता पूर्णपणे बंद झाल्यामुळे कामगार बाहेर पडू शकले नाहीत. सीमा रस्ते संस्थेच्या जेसीबी मशीन तातडीने घटनास्थळी दाखल करण्यात आल्या असून चिखल व दगड हटवण्याचे काम सुरू आहे. अधिकाऱ्यांच्या माहितीनुसार, काही तासांत मार्ग मोकळा होईल आणि सर्व कर्मचारी सुरक्षितपणे बाहेर येतील अशी अपेक्षा आहे.
या दुर्घटनेची माहिती मिळताच स्थानिक प्रशासन व कंपनीचे अधिकारी घटनास्थळी दाखल झाले आहेत. अडकलेल्या कर्मचाऱ्यांशी सतत संपर्क साधला जात असून, त्यांच्या सुरक्षिततेबाबत कोणताही धोका नसल्याचे प्रशासनाने स्पष्ट केले आहे. कर्मचाऱ्यांकडे आवश्यक त्या अन्नपाण्याची सोय असून, सर्वजण सुरक्षित आहेत.
धौलीगंगा पॉवर प्रोजेक्टमधून वीज निर्मितीचे कामही सुरूच आहे. पॉवर स्टेशनच्या तोंडाशी झालेल्या भूस्खलनामुळे तात्पुरता मार्ग बंद झाला असला तरी आतल्या कामकाजावर याचा परिणाम झालेला नाही. अधिकाऱ्यांनी नागरिकांना शांत राहण्याचे आवाहन केले असून, बचावकार्य जलद गतीने सुरू असल्याचे सांगितले आहे. या दुर्घटनेमुळे परिसरात भीतीचे वातावरण निर्माण झाले असले तरी प्रशासनाकडून दिलेल्या खात्रीनुसार सर्व कर्मचारी सुखरूप आहेत आणि काही तासांत त्यांना सुरक्षित बाहेर काढण्यात येईल.