नवी दिल्ली : केंद्रीय कायदा मंत्री किरेन रिजिजू यांच्या कारला अपघात झाल्याची माहिती मिळत आहे. जम्मू-काश्मीरमध्ये किरेन रिजिजू यांच्या कारला ट्रकने धडक दिली आहे. या घटनेत सुदैवाने रिजिजू थोडक्यात बचावले आहेत. जम्मू-काश्मीरमधील रामबन जिल्ह्यात शनिवारी ही घटना घडली. याचा एक व्हिडिओही सोशल मीडियावर व्हायरल झाला आहे.

माहितीनुसार, जम्मू-काश्मीर महामार्गावरून किरेन रिजिजू यांची गाडी जात असताना एक ट्रक ड्रायव्हर ट्रक रिव्हर्स घेत होता. यावेळी हा अपघात घडल्याची माहिती आहे. ट्रक मागे येत असतानाच किरेन रिजिजू यांची गाडी ट्रकच्या मागच्या भागाला जाऊन धडकली. या अपघातात रिजिजू थोडक्यात बचावले आहेत.

या अपघातात रिजिजू यांना कोणत्याही प्रकारची दुखापत झाली नाही. त्याच्यासोबत त्या गाडीतील इतर लोकही सुरक्षित आहेत. सध्या स्थानिक पोलीस या संपूर्ण प्रकरणाचा तपास करत आहेत.