भुवया म्हणजे चेहऱ्याचा एक अत्यंत महत्वाचा भाग. त्या चेहऱ्याला केवळ सौंदर्यच देत नाहीत, तर चेहऱ्याच्या अभिव्यक्तीलाही उठावदार बनवतात. मेकअप करताना जसा फोकस डोळ्यांवर असतो, तसाच फोकस आता भुवयांवरही दिला जातो. हल्ली सोशल मीडियावर ‘आयब्रो हेअर ट्रान्सप्लांट’ हा नवा सौंदर्य ट्रेंड गाजतो आहे. विशेष म्हणजे, काही मराठी अभिनेत्रीही हा ट्रिटमेंट घेताना दिसत आहेत.
सायली संजीव आणि अभिज्ञा भावे यांचा बदललेला लूक
मराठी चित्रपटसृष्टीतील प्रसिद्ध अभिनेत्री सायली संजीव आणि अभिज्ञा भावे यांनी आयब्रो हेअर ट्रान्सप्लांट करून घेतल्याची माहिती समोर आली आहे. त्यांच्या चेहऱ्यातील बदलामुळे आणि अधिक उठावदार भुवयांमुळे त्यांच्या चाहत्यांमध्येही या उपचाराबाबत उत्सुकता वाढली आहे. नैसर्गिक कारणांमुळे किंवा ओव्हर-थ्रेडिंगमुळे भुवया विरळ होऊ शकतात, आणि अशा वेळी ट्रान्सप्लांट हा उत्तम उपाय मानला जातो.
आयब्रो हेयर ट्रान्सप्लांट म्हणजे नेमकं काय?
या प्रक्रियेत डोक्याच्या मागील भागातून केसांचे फॉलिकल्स (मुळे) घेतले जातात आणि भुवयांमध्ये विशिष्ट रचनेनुसार प्रत्यारोपित केले जातात. ही प्रक्रिया अत्यंत बारकाईने केली जाते. कारण भुवयांची दिशा, घनता आणि वळण यांचा चेहऱ्याच्या सौंदर्यावर मोठा परिणाम होतो. ट्रान्सप्लांट केलेले केस ३–४ महिन्यांत वाढायला सुरुवात करतात, पण नैसर्गिक रूप मिळवण्यासाठी ८–१२ महिने लागतात.
मायक्रोब्लेडिंग विरुद्ध ट्रान्सप्लांट
आयब्रो ट्रान्सप्लांट ही सर्जिकल प्रक्रिया असली तरी, मायक्रोब्लेडिंग ही नॉन-सर्जिकल प्रक्रिया असून ती देखील लोकप्रिय आहे. मायक्रोब्लेडिंगमध्ये विशेष पिगमेंट्सद्वारे भुवयांमध्ये स्ट्रोक्स तयार केले जातात. ही प्रक्रिया वेदनारहित असून तिचा परिणाम २–३ वर्ष टिकतो. मात्र, ती केसांची नैसर्गिक वाढ करत नाही.
ट्रीटमेंटची किंमत किती?
मुंबईमध्ये आयब्रो ट्रान्सप्लांटची किंमत सुमारे ₹२५,००० पासून सुरू होते. ही किंमत क्लिनिक, सर्जनचा अनुभव, आणि आवश्यक केसांच्या संख्येनुसार वाढू शकते. सामान्यतः दोन्ही भुवयांसाठी ८०० ते १००० केसांची गरज असते.
उपचार वेदनारहित का?
या प्रक्रियेसाठी भूल दिली जाते, त्यामुळे ती वेदनारहित असते. मात्र, डोक्याच्या मागच्या भागात थोडीशी वेदना होऊ शकते, जी साधारणतः २४–४८ तासांत कमी होते. योग्य सर्जनकडून केल्यास ही प्रक्रिया सुरक्षित आणि प्रभावी मानली जाते.