मुंबई महानगर परिवहन प्राधिकरण (एमएमआरटीए) यांच्याकडून बेस्टच्या भाडेवाढीच्या प्रस्तावास मान्यता मिळाली आहे. मात्र, अद्याप अंतिम इतिवृत्तावर सही न झाल्यामुळे या निर्णयाची अधिकृत घोषणा लांबणीवर आहे, अशी माहिती सूत्रांकडून मिळते. बुधवारी पार पडलेल्या एमएमआरटीएच्या बैठकीत ही मंजुरी देण्यात आली.

बेस्ट उपक्रमाने साध्या बससाठी 5 किमी अंतराचे भाडे 5 रुपयांवरून 10 रुपये आणि वातानुकूलित (एसी) बससाठी 6 रुपयांवरून 12 रुपये करण्याचा प्रस्ताव सादर केला होता. मुंबई महापालिकेची मंजुरी मिळाल्यानंतर तो प्रस्ताव अंतिम निर्णयासाठी एमएमआरटीएकडे पाठवण्यात आला होता.

दरम्यान, बेस्टच्या भाडेवाढीसोबतच रिक्षा व टॅक्सी मीटर रिकॅलिब्रेशनसाठी दिलेली 30 एप्रिलची अंतिम मुदत एक महिना वाढवण्यात आली आहे. आतापर्यंत सुमारे 63 टक्के वाहनेच रिकॅलिब्रेशन प्रक्रिया पूर्ण करू शकली आहेत. उर्वरित वाहनांवर दंडाची कारवाई होऊ शकते, अशी भीती संघटनांनी व्यक्त केली होती. त्यामुळे बुधवारी झालेल्या बैठकीत ही मुदतवाढ देण्याचा निर्णय घेण्यात आला.