देशात सध्या सर्वत्र जोरदार पाऊस सुरु आहे. अनेक राज्यांत अतिमुसळधार पावसामुळे पुरसदृष्य परिस्थिती निर्माण झाली आहेत. त्यातच उत्तरेकडील राज्यांमध्ये पावसानं चांगलंच थैमान घातल्याचं दिसून येतंय. काल अमरनाथच्या पवित्र गुहेजवळ मोठी ढगफुटी झाल्याची घटना ताजीच असताना आता हिमाचल प्रदेशमधील एक व्हिडिओ सोशल मीडियावर तुफान व्हायरल होतोय. सोशल मीडियावर व्हायरल होणारा हा व्हिडिओ हिमाचल प्रदेशचा असल्याचं एन. आय. या वृत्तसंस्थेकडून सांगण्यात आलं आहे. या व्हिडिओमध्ये चार मजली इमारत पत्त्याच्या बंगल्यासारखी कोसळत असल्याचं पाहायला मिळतंय.
हिमाचल प्रदेशच्या चोपाल गावात ही घटना घडली असल्याचं प्राथमिक माहितीमधून समोर आलं आहे. स्थानिक प्रशासनानं दिलेल्या सुचनेनंतर रहिवाशांनी ही इमारत आधीच रिकामी केली होती. त्यामुळे या घटनेत कोणतहीही जिवीत हाणी झाली नाही.
दरम्यान, जम्मू-काश्मीरच्या मधील अमरनाथ गुहेजवळ शुक्रवारी ढगफुटी (Amarnath Cloudburst) होऊन 15 जणांचा मृत्यू झाला असून, अनेक जण बेपत्ता असल्याची माहिती आहे. सायंकाळी साडेपाचच्या सुमारास ढगफुटी झाल्याची नोंद झाली आहे. "सायंकाळी 5.30 च्या सुमारास मुसळधार पाऊस सुरू असताना अचानक पाण्याचा मोठा प्रवाह आला. अमरनाथ गुहेच्या वरच्या भागात ढगफुटी झाली. एजन्सींना सतर्क करण्यात आलं आहे. लोकांना 10-15 मिनिटांत बाहेर काढण्यात आलं अशी माहिती आयटीबीपीचे पीआरओ विवेक कुमार पांडे यांनी दिली आहे. केंद्रीय गृहमंत्री अमित शहांनी या घटनेची दखल घेतली असून, "बाबा अमरनाथजींच्या गुहेजवळील ढगफुटीमुळे आलेल्या महापुराबाबत मी एलजी मनोज सिन्हा यांच्याशी बोलून परिस्थितीची माहिती घेतली. एनडीआरएफ, सीआरपीएफ, बीएसएफ आणि स्थानिक प्रशासन बचाव कार्य करत आहेत. लोकांचे जीव वाचवणे ही आमची प्राथमिकता आहे. मी सर्व भक्तांसाठी प्रार्थना करतोय" असं अमित शहा म्हणाले आहेत.