सरत्या वर्षाला निरोप देत आणि नववर्षांचे स्वागत करण्यासाठी प्रत्येकजण तयारी करत असते. थर्टी फर्स्टची पार्टी करण्यासाठी वेगवेगळ्या प्रकारे नियोजन करण्यात येते. अनेकजण वेगवेगळ्या पद्धतीने नववर्षाचे स्वागत करतात.
नववर्षाच्या स्वागतासाठी मुंबईकर सज्ज झाले असून 15 हजार पोलिसांचा फौजफाटा तैनात करण्यात आला आहे. यासोबतच 'ड्रंक अॅण्ड ड्राइव्ह'च्या विरोधात पोलिस विशेष मोहीम राबविणार आहेत. चौपाट्यांच्या ठिकाणी पोलीस उपायुक्तांच्या निगराणीखाली विशेष बंदोबस्त ठेवण्यात आला आहे.
बरोबरच सशस्त्र दल, राज्य राखीव दल, बॉम्बशोधक आणि नाशक पथके, श्वान पथके, दंगल नियंत्रक पथके, शीघ्र कृती दल आणि फोर्सवन आदी विशेष पथकांवरही सुरक्षेची जबाबदारी आहे. सीसीटीव्ही कॅमेऱ्यांच्या माध्यमातून मुंबई पोलिस आयुक्तालयातील सुसज्ज मुख्य नियंत्रण कक्षातून शहरातील हालचालींवर लक्ष ठेवण्यात येणार असल्याची माहिती मिळत आहे.