मुंबईतील दादर रेल्वे स्थानकावर लंडनहून आलेल्या 66 वर्षीय एनआरआय महिलेचा झालेला अपघाती मृत्यू अत्यंत हृदयद्रावक ठरला आहे. टॉयलेट शोधताना झालेली ही दुर्घटना रेल्वे प्रवाशांच्या सुरक्षेवर पुन्हा प्रश्नचिन्ह निर्माण करते. अंबरनाथहून दादरला आलेली ही महिला प्लॅटफॉर्मवर शौचालय न सापडल्याने बाजूला उभ्या असलेल्या मेल एक्स्प्रेसमध्ये चढली. परंतु गाडी सुटताच तिने चालत्या ट्रेनमधून उतरायचा प्रयत्न केला आणि याच क्षणी तिचा तोल गेल्याने ती ट्रेन आणि प्लॅटफॉर्मदरम्यानच्या फटीत अडकली.
अपघातानंतर उपस्थित प्रवासी आणि रेल्वे कर्मचाऱ्यांनी तातडीने महिलेची सुटका केली आणि तिला सायन रुग्णालयात दाखल करण्यात आले. मात्र, गंभीर जखमांमुळे उपचारादरम्यान तिचा मृत्यू झाला. दादर रेल्वे पोलिसांनी या प्रकरणी अपमृत्यूची नोंद केली आहे. मृत महिला व तिचे पती बादशाह शेख हे मूळ हैदराबादचे असले तरी गेल्या तीन दशकांपासून संपूर्ण कुटुंब लंडनमध्ये स्थायिक आहे. दर काही वर्षांनी भारतातील नातेवाईकांना भेट देण्यासाठी ते मुंबई व बेंगळुरूला येतात. काही दिवसांपूर्वीच दोघे अंबरनाथला आले होते आणि विमानतळाकडे जाण्यासाठी त्यांनी दादरला लोकल पकडली होती. मात्र, एका क्षणाच्या चुकीने मोठा अनर्थ घडला. महिलेचा मृतदेह अंतिम संस्कारासाठी हैदराबादला पाठवण्यात आला असून शेख कुटुंबीयांवर शोककळा पसरली आहे.
ठाण्यातील विद्यार्थ्यांचा लखनऊतून सुटका; आमदार जितेंद्र आव्हाडांच्या हस्तक्षेपामुळे संकटातून मुक्तता
दुसरीकडे, ठाण्यातील डॉ. बेडेकर महाविद्यालयातील स्काऊट-गाईड कॅम्पसाठी लखनऊला गेलेल्या विद्यार्थ्यांना परतीच्या प्रवासादरम्यान मोठ्या अडचणींचा सामना करावा लागला. एकूण 15 विद्यार्थी आणि दोन शिक्षक परतीसाठी पुष्पक एक्स्प्रेस पकडणार होते. मात्र, गाडी सुटल्याने ते अडकून पडले. खाजगी बस ट्रॅव्हल्सशी संपर्क साधल्यानंतर बस मिळाली, परंतु धक्कादायक म्हणजे बस चालकाने विद्यार्थ्यांना मध्यरस्त्यात उतरायला सांगत तिथून बस काढून नेली.
परक्या शहरात मुले आणि शिक्षक असुरक्षित परिस्थितीत अडकल्याने पालकांमध्येही भीतीचे वातावरण निर्माण झाले. परिस्थितीची माहिती मिळताच पालकांनी राष्ट्रवादी काँग्रेस पक्ष (शरद पवार गट) चे आमदार जितेंद्र आव्हाड यांना संपर्क साधला. आव्हाड यांनी तातडीने लखनऊतील समाजवादी पक्षाचे स्थानिक पदाधिकारी यांच्याशी संपर्क करीत विद्यार्थ्यांना सुरक्षित ठिकाणी हलवण्याची व्यवस्था केली. सध्या सर्व विद्यार्थ्यांना एका सुरक्षित आश्रमात ठेवण्यात आले आहे आणि त्यांना परतीच्या प्रवासासाठी योग्य सोय करून ठाण्याकडे रवाना करण्याचे काम सुरू आहे. या घटनेमुळे विद्यार्थ्यांच्या सुरक्षेच्या बाबतीत खाजगी बस व्यवस्थेवर अनेक प्रश्न उपस्थित झाले आहेत.