मुंबई : मुंबईत आज हाय होल्टेज ड्रामा पाहायला मिळाला. मातोश्रीवर (Matoshree) जाऊन हनुमान चालिसा (Hanuman Chalisa) वाचण्याचा हट्ट धरलेल्या राणा (Navneet-Ravi Rana) दाम्पत्यांनी आपला निर्णय मागे घेतला आहे. त्यानंतर आता शिवसैनिकांनी (Shivsena) आक्रमक होत राणा दाम्पत्यांनी माफी मागावी अन्यथा त्यांना घराबाहेर पडू देणार नाही असं शिवसैनिक म्हणाले आहेत. यावरुन आता नारायण राणे (Narayan Rane) यांनी उद्धव ठाकरे, संजय राऊत आणि शिवसेनेवर यावेळी गंभीर आरोप केले. राणा दाम्पत्याला जर बाहेर पडू देत नसतील तर मी तिथे जाईल आणि त्यांना बाहेर काढेल असं राणे म्हणाले.

मातोश्री आणि राणा दाम्पत्याच्या घराबाहेर हजारो वगैरे नाही तर 200-300लोक असल्याचं राणे म्हणाले. राणांच्या घराबाहेरून पोलिसांनी बाजुला व्हावं राणा स्वत: चालत बाहेर येतील असं राणे म्हणाले. तसंच केंद्रीय यंत्रणा योग्य वेळेवर योग्य कारवाई करतील असंही नारायण राणे म्हणाले.

दिशा सालियान प्रकरणात मला बोलावलं आणि विचारलं सुशांत सिंहच्या मृत्यूबद्द तुम्हाला काय माहितीये? त्यावेळी मी सांगितलं तुम्हाला माहिती तेच मला माहिती आहे. दिशा सालियानवर पार्टीत अत्याचार झाला. तिच्या गाडीत ती घरी जाताना कोण होतं? घरी देखील तिच्यावर अत्याचार करण्यात आले आणि तिला वरुन फेकून दिलं असं राणे म्हणाले.

संजय राऊत यांनी नवणीत राणांवर खोट्या कागदपत्रांच्या आधारे खासदार झाल्याचा आरोप केला. त्यावर बोलताना नारायण राणे म्हणाले संजय राऊत यांनी मी खासदार केलं. बाळासाहेब ठाकरे मला म्हणाले होते, जा यांना खासदार कर. त्यावेळी खोटे कागदपत्र सादर केले. मतदार यादीतही संजय राऊत यांचं नाव नव्हतं असं नारायण राणे म्हणाले.