2024 -25 या आर्थिक वर्षासाठी आयकर विवरणपत्र भरण्याचा हंगाम सुरू झाला आहे. पूर्वी विवरणपत्र भरण्याची शेवटची तारीख 31 जुलै होती पण आता ही अंतिम तारीख 15 सप्टेंबर 2025 पर्यंत वाढविण्यात आली आहे. पगारदार कर्मचाऱ्यांनाही 15 जूनपर्यंत त्यांचे रिटर्न भरण्यासाठी फॉर्म-16 मिळेल. मात्र आता यामध्ये मोठे बदल दिसून येणार आहेत.

फॉर्म 16 मधील बदल :

फॉर्म-16 हा एक अतिशय महत्त्वाचा दस्तऐवज आहे, ज्यामध्ये तुमच्या पगाराची आणि तुम्ही भरलेल्या कराची संपूर्ण माहिती असते. यामुळे आयटीआर दाखल करणे सोपे होते आणि चुका होण्याची शक्यता देखील कमी होते. यावेळी, फॉर्म-16 च्या नवीन फॉरमॅटमध्ये इतर स्रोतांमधून मिळणाऱ्या उत्पन्नावरील टीडीएस (स्रोतावर कर वजा) आणि काही खर्चांवर घेतलेल्या टीसीएस (स्रोतावर कर गोळा) इत्यादींची माहिती दिली जाईल. जर तुम्ही तुमच्या नियोक्त्याला फॉर्म 12BBA सादर केला असेल तरच हे होईल.

फॉर्म 12BBA म्हणजे काय ?

केंद्रीय प्रत्यक्ष कर मंडळाने फॉर्म 12BBA जारी केला आहे. हा फॉर्म मुदत ठेवींवर भरलेला कर, इक्विटी शेअर्सवरील लाभांश, विमा कमिशन, कार खरेदी किंवा परकीय चलनाची नोंद करण्यासाठी वापरला जातो. त्यानंतर नियोक्ता म्हणजे कंपनी या आधारे पगारातून TDS कापते. याआधी हा फॉर्म फक्त एलआयसी, एचआरए किंवा गृहकर्ज इत्यादी कर वाचवण्यासाठी केलेल्या गुंतवणुकीची माहिती देण्यास परवानगी देत ​​असे.

किती मिळणार सूट ?

याशिवाय, यावर्षी अर्थसंकल्पात, सरकारने नवीन आयकर व्यवस्थेअंतर्गत मानक वजावट अंतर्गत सूट 50,000 रुपयांवरून 75,000 रुपये केली आहे. अशा परिस्थितीत, जर तुम्ही नवीन कर व्यवस्था निवडली असेल, तर तुम्हाला फॉर्म 16 मध्ये टीडीएस कपात अंतर्गत 75,000 रुपयांची सूट मिळेल. नवीन कर प्रणालीमध्ये, कर्मचारी कलम 80CCD (2) अंतर्गत त्यांच्या मूळ पगाराच्या 14% पर्यंत कपातीचा दावा करू शकतात. ही वजावट कर्मचाऱ्याच्या राष्ट्रीय पेन्शन प्रणाली (NPS) खात्यात नियोक्त्याच्या योगदानावर दावा करता येते.