थोडक्यात

रायगडमधून एक धक्कादायक घटना समोर आली आहे

सोशलमीडियाची ओळख पडली महागात

इंस्टाग्रामवर ओळख झालेल्या एका 16 वर्षीय मुलाने लग्नाचे आमिष दाखवून तिच्याशी शारीरिक संबंध ठेवले

रायगडच्या उरणमध्ये सोशल मीडियावर सुरू झालेली ओळख एका 17 वर्षीय अल्पवयीन मुलीसाठी गंभीर ठरली आहे. इंस्टाग्रामवर ओळख झालेल्या एका 16 वर्षीय मुलाने लग्नाचे आमिष दाखवून तिच्याशी शारीरिक संबंध ठेवले. मात्र, मुलगी गर्भवती राहिल्यावर त्याने तिच्याशी लग्न करण्यास नकार दिला.

उरण पोलिसांनी दिलेल्या माहितीनुसार, पीडित मुलगी आणि आरोपी मुलगा दोघांनीही आपले शिक्षण अर्धवट सोडले आहे. जानेवारी 2024 मध्ये त्यांची इंस्टाग्रामवर ओळख झाली आणि त्यानंतर प्रेमसंबंध निर्माण झाले. मुलीच्या पालकांना याची माहिती मिळाल्यावर त्यांनी मुलाच्या कुटुंबीयांची भेट घेतली. त्यावेळी मुलाने लग्न करण्याची इच्छा व्यक्त केली, आणि मुलीच्या पालकांनीही तिचे वय पूर्ण झाल्यावर लग्न लावून देण्याची तयारी दाखवली. तोपर्यंत मुलीला मुलाच्या घरी ठेवण्यात आले. मात्र, मुलगी गर्भवती राहिल्यानंतर मुलाने आणि त्याच्या कुटुंबीयांनी लग्न करण्यास नकार दिला आणि तिला घरातून बाहेर काढले.

पीडित मुलीच्या तक्रारीवरून पोलिसांनी अल्पवयीन मुलावर बलात्कार आणि पॉक्सो कायद्यांतर्गत गुन्हा दाखल केला आहे. या प्रकरणातील आरोपीला ताब्यात घेऊन त्याची बालसुधारगृहात रवानगी करण्यात आली आहे. या घटनेमुळे सोशल मीडियाच्या वापराबाबत आणि अल्पवयीन मुला-मुलींच्या सुरक्षिततेवर गंभीर प्रश्न निर्माण झाले आहेत.