भारताच्या अणुऊर्जा क्षेत्रातील ज्येष्ठ व ख्यातनाम शास्त्रज्ञ तसेच अणुऊर्जा आयोगाचे माजी अध्यक्ष डॉ. एम. आर. श्रीनिवासन यांचे आज मंगळवारी निधन झाले. ते 95 वर्षांचे होते. त्यांच्या पश्चात पत्नी आणि एक मुलगी असा परिवार आहे. डॉ. श्रीनिवासन यांनी भारताच्या अणुऊर्जा विकासात मोलाचे योगदान दिले असून, त्यांनी महान वैज्ञानिक डॉ. होमी भाभा यांच्यासोबतही कार्य केले होते. त्यांच्या कार्यामुळे देशाच्या अणुऊर्जा कार्यक्रमाला भक्कम पाया मिळाला.चेन्नईमध्ये त्यांच्या पार्थिवावर अंत्यसंस्कार करण्यात आले. यावेळी जिल्हाधिकारी लक्ष्मी भाव्या तन्नीरु यांनी त्यांच्या पार्थिवाला पुष्पांजली अर्पण करून श्रद्धांजली वाहिली. त्यांच्या जाण्यामुळे भारतीय वैज्ञानिक क्षेत्रात मोठी पोकळी निर्माण झाली आहे.
डॉ. म्य्लापूर रामास्वामी श्रीनिवासन हे भारताचे ख्यातनाम अणुशास्त्रज्ञ होते. त्यांचा जन्म 5 जानेवारी 1930 रोजी झाला. त्यांनी बनारस हिंदू विद्यापीठातून अभियांत्रिकीचे शिक्षण घेतले. नंतर त्यांनी अमेरिका येथील इल्यिनॉय विद्यापीठातून अणुऊर्जा अभियांत्रिकीचे उच्च शिक्षण घेतले. त्यांनी भारताच्या अणुऊर्जा कार्यक्रमात महत्त्वाची भूमिका बजावली. त्यांनी डॉ. होमी भाभा यांच्यासोबत कार्य केले. 1987 ते 1990 या काळात ते अणुऊर्जा आयोगाचे अध्यक्ष होते.
भारतातील पहिल्या PHWR रिअ‍ॅक्टरच्या विकासात त्यांचे मोलाचे योगदान होते. त्यांच्या कार्याबद्दल त्यांना पद्मश्री (1984) व पद्म भूषण (1990) सन्मान मिळाले आहेत. डॉ. श्रीनिवासन यांनी न्यूक्लिअर पॉवर कॉर्पोरेशन ऑफ इंडिया लिमिटेड (NPCIL) च्या स्थापनेत महत्त्वाची भूमिका बजावली. ते अणुऊर्जा क्षेत्रातील धोरणनिर्मितीत सक्रियपणे सहभागी होते. भारताच्या अणुऊर्जा आत्मनिर्भरतेसाठी त्यांनी ठोस पावले उचलली. त्यांचे योगदान आजही वैज्ञानिक आणि शैक्षणिक क्षेत्रात आदर्श मानले जाते. त्यांच्या निधनाने भारतीय अणुऊर्जा क्षेत्राने एक दूरदृष्टी असलेला मार्गदर्शक गमावला आहे.