Rohit Sharma Viral Video : मुंबई इंडियन्सने गुरुवारी झालेल्या सामन्यात रॉयल चॅलेंजर्स बंगलोरचा दारुण पराभव करत एकतर्फी विजय मिळवला. परंतु, दिनेश कार्तिकच्या फलंदाजीने सर्वांची मनं जिंकली. कार्तिकने २३ चेंडूत ५३ धावांची खेळी केली. आक्रमक फलंदाजी करून दिनेश कार्तिकने आरसीबीच्या गोलंदाजांचा समाचार घेतला. कार्तिकच्या फलंदाजीची स्टाईल पाहून रोहित शर्माही इम्प्रेस झाल्याचं एका व्हायरल व्हिडीओच्या माध्यमातून समोर आलं आहे.
कार्तिकची फलंदाजी पाहून रोहितने मैदानात ज्या प्रकारे रिअॅक्शन दिली, ते पाहून अनेकांच्या भुवया उंचावल्या आहेत. कार्तिक फलंदाजी करत असताना रोहित शर्मा स्लिपमध्ये क्षेत्ररक्षण करत होता. कार्तिकच्या धमाकेदार फलंदाजीला पाहून रोहित त्याच्याजवळ गेला. त्यावेळी रोहितने कार्तिकला वर्ल्डकप खेळण्याबाबत विचारलं. पण रोहितचा आवाज स्टंम्प माईकमध्ये कैद झाला.
रोहित म्हणाला, वर्ल्डकप निवडीसाठी पुश करायचं आहे, डोक्यात तर हेच चालू आहे. वर्ल्डकप खेळायचंय, वर्ल्डकप. रोहित हे सर्व बोलत असताना त्याच्याजवळ ईशान किशनही होता. ईशानच्या रिअॅक्शनही चर्चेचा विषय ठरली आहे. दरम्यान, कार्तिकच्या ५३ धावांच्या जोरावर आरसीबीला १९६ धावांपर्यंत मजल मारता आली. कार्तिकने ५ चौकार आणि ४ षटकार ठोकून ५३ धावा केल्या. परंतु, दिनेश कार्तिकची खेळी व्यर्थ ठरली. कारण मुंबईने ७ विकेट्स राखून या सामन्यात आरसीबीचा पराभव केला.