BMC Election : आगामी मुंबई महानगरपालिका निवडणुकीच्या पार्श्वभूमीवर मराठी अस्मितेचा मुद्दा पुन्हा एकदा चर्चेत आला आहे. मनसेचे नेते संदीप देशपांडे यांनी मुंबईचा पुढचा महापौर हा मराठीच असेल आणि तो ठाकरे विचारसरणी मानणारा असेल, असा ठाम विश्वास व्यक्त केला आहे. भाजपकडून मुंबईवर परप्रांतीय महापौर बसवण्याचा प्रयत्न सुरू असल्याचा आरोप करत त्यांनी राजकीय वर्तुळात खळबळ उडवून दिली आहे.

राज्यात सध्या महापालिका निवडणुकांचा माहोल चांगलाच तापला आहे. महाराष्ट्रातील २७ महापालिकांच्या निवडणुका लवकरच होणार असून, उमेदवारी अर्ज भरण्याचा आज शेवटचा दिवस आहे. त्यामुळे सर्व पक्षांमध्ये हालचालींना वेग आला आहे. मुंबईतील निवडणूक लढत आता केवळ विकासापुरती मर्यादित न राहता, मराठी माणसाच्या हक्कांवर आणि महापौर पदावर केंद्रित झाली आहे.

दादरमधील वॉर्ड क्रमांक १९२ मधून मनसेने यशवंत किल्लेदार यांना उमेदवार घोषित केले आहे. त्यांच्या अर्ज भरण्यावेळी मोठ्या संख्येने कार्यकर्ते आणि पदाधिकारी उपस्थित होते. यावेळी बोलताना संदीप देशपांडे यांनी भाजपवर जोरदार टीका केली. मराठी माणूस एकत्र येत असल्याचे पाहून विरोधक घाबरले आहेत. महापालिकेत भ्रष्टाचार करणाऱ्यांना आता बाहेरचा रस्ता दाखवण्याची वेळ आली आहे, असे त्यांनी सांगितले.

भाजप आमदार अमित साटम यांनी मनसे आणि ठाकरे गटावर टीका केल्यानंतर देशपांडे यांनी त्याला उत्तर दिले. भाजप नेत्यांना मुंबईच्या हितापेक्षा परप्रांतीय मतांचे राजकारण अधिक महत्त्वाचे वाटते, असा आरोप त्यांनी केला. भाजप मुंबईत परप्रांतीय महापौर आणण्याच्या तयारीत आहे, मात्र मनसे ते कधीही यशस्वी होऊ देणार नाही, असे त्यांनी स्पष्ट केले.

पुढील राजकीय समीकरणांवर भाष्य करताना देशपांडे यांनी दावा केला की माहीम विधानसभा मतदारसंघातून ठाकरे विचारांचे सहा नगरसेवक निवडून येतील. मुंबईची सत्ता कोणाच्या हाती द्यायची हे आता मुंबईतील मराठी नागरिकांनी ठरवले आहे. मुंबईचा महापौर मराठीच होणार, याबाबत कोणतीही शंका नाही, असा विश्वास त्यांनी व्यक्त केला. दरम्यान, या निवडणुका केवळ सत्तेसाठी नसून महाराष्ट्राच्या ओळखीची आणि स्वाभिमानाची लढाई असल्याचे चित्र दिसत आहे. युती, आघाडी आणि पक्षांतर्गत मतभेद, तसेच उमेदवारीवरून सुरू असलेले वाद पाहता, ही निवडणूक राज्याच्या पुढील राजकीय वाटचालीसाठी महत्त्वाची ठरणार असल्याचे बोलले जात आहे.

थोडक्यात

• आगामी मुंबई महापालिका निवडणुकीच्या पार्श्वभूमीवर मराठी अस्मितेचा मुद्दा पुन्हा चर्चेत
• मनसे नेते संदीप देशपांडेंकडून मुंबईच्या महापौरपदाबाबत ठाम भूमिका
• “मुंबईचा पुढचा महापौर मराठीच असेल” असा संदीप देशपांडेंचा विश्वास
• महापौर ठाकरे विचारसरणी मानणारा असेल, असा मनसेचा दावा
• भाजपवर परप्रांतीय महापौर बसवण्याचा प्रयत्न करत असल्याचा आरोप
• संदीप देशपांडेंच्या वक्तव्यामुळे राजकीय वर्तुळात खळबळ