राहुल गांधींनी त्यांच्या मोबाईलमध्ये पेगासस टाकून फोन टॅप केले जात असल्याचा आरोप केल्यामुळे राजकीय वातावरण चांगलेच तापले आहे. यावरुन अनेक आरोप - प्रत्यारोप सुरु आहे. याच पार्श्वभूमीवर आता ठाकरे गटाकडून जोरदार हल्लाबोल करण्यात आला आहे.

मोदी हे भ्रष्टाचारमुक्त शासनाच्या वल्गना करतात. सगळ्यात भ्रष्ट शासन व्यवस्था त्यांचीच आहे. याच आमदार मडल यांच्या चिरंजीवांना लाखोंची लाच स्वीकारताना अटक करण्यात आली, पण त्यावर भाजपवाले बोलायला तयार नाहीत. “राहुल गांधी यांचे केंब्रिज विद्यापीठातले भाषण सध्या गाजते आहे. गांधी यांच्या फोनमध्ये ‘पेगॅसस’ सोडून त्यांचे फोन ऐकले जात होते. या सगळ्याचा स्फोट राहुल गांधी यांनी केंब्रिज येथे केला. त्यामुळे देशाची बदनामी झाल्याचा ‘राग’ भाजपच्या पोपटरावांनी आळवला. मग नरेंद्र मोदी आतापर्यंत विदेशात जाऊन पंडित नेहरूंपासून इंदिराजी, राजीव गांधी व त्यांच्या सरकारबाबत जी मुक्ताफळे उधळत होते ती देशाची बदनामी नाही का? असे सामनातून विचारण्यात आले आहे.

तसेच निवडणूक आयोग तर भाजपच्या ताटाखालचे मांजर होऊन सत्ताधाऱ्यांच्या दारात शेपटी हलवत बसला आहे. म्हणूनच सर्वोच्च न्यायालयास निवडणूक आयोगाच्या बाबतीत कठोर निर्णय घ्यावा लागला व मुख्य निवडणूक आयुक्तांच्या नियुक्तीसाठी त्रिसदस्यीय समिती नेमावी लागली. भाजपच्या मनमानीस दिलेली ही चपराक आहे. असे म्हणत सामनातून भाजपावर जोरदार हल्लाबोल करण्यात आला आहे.