थोडक्यात
प्रवाशांच्या सोयीसाठी आणि ई-बस सेवेला अधिक प्रतिसाद
ई-बस प्रवाशांसाठी एसटीकडून मासिक व त्रैमासिक पास योजना
अनेक प्रवाशांना या मासिक व त्रैमासिक पास योजनेचा फायदा होणार
प्रवाशांच्या सोयीसाठी आणि ई-बस सेवेला अधिक प्रतिसाद मिळवण्यासाठी एक महत्त्वाचा निर्णय महाराष्ट्र राज्य मार्ग परिवहन महामंडळाने (एसटी महामंडळाने) घेतला आहे. त्यानुसार मासिक व त्रैमासिक पास सवलत योजना आता राज्यातील ई-बस प्रवाशांना उपलब्ध होणार आहे.
अनेक प्रवाशांकडून ई-बस सेवेत पास प्रणालीची मागणी केली जात होती. या पार्श्वभूमीवर महामंडळाने प्रवाशांना अधिक सोयीस्कर आणि आर्थिकदृष्ट्या परवडणारा प्रवास देण्यासाठी ही योजना लागू करण्याचा निर्णय घेतला आहे. नोकरी व व्यवसायाच्या निमित्ताने दररोज एकाच मार्गावर प्रवास करणाऱ्या ई-बस पास योजनांचा मुख्य उद्देश नियमित प्रवाशांना ई-बस सेवेकडे आकर्षित करणे हा आहे. ई-बस प्रकल्पातील ४४८ बस आणि शिवाई प्रकल्पातील ५० ई-बसेस सध्या महामंडळाच्या ताफ्यात कार्यरत आहेत. या बसेसची संख्या भविष्यात आणखी वाढवण्याचा मानस आहे. अनेक प्रवाशांना या मासिक व त्रैमासिक पास योजनेचा फायदा होणार आहे. तसेच प्रवासी संख्येत वाढ होण्याची शक्यता आहे.
पास योजनेची प्रमुख वैशिष्ट्ये
- ९ मीटर ई-बस, १२ मीटर ई-बस आणि ई-शिवाई सेवेमध्ये हे पासेस उपलब्ध असतील. (ई-शिवनेरी बससेवा वगळून)
- मासिक पास : (३० दिवस) : २० दिवसांच्या परतीच्या प्रवासाचे भाडे आकारून ३० दिवसांसाठी पास दिला जाईल.
- त्रैमासिक पास : (९० दिवस) : ६० दिवसांच्या परतीच्या प्रवासाचे भाडे आकारून ९० दिवसांचा पास उपलब्ध होईल.
- सेवा वर्गातील लवचिकता : उच्च सेवा वर्गाचा पास वापरून प्रवासी निमआराम किंवा साध्या बसमध्येही प्रवास करू शकतील.
- फरक भाडे नियम : निमआराम किंवा साध्या बसच्या पासधारकांना ई-बसने प्रवास करायचा असल्यास, भाड्यातील फरक १००% दराने भरून तिकीट घेऊन प्रवास करता येईल.