मुंबई : मुंबईच्या पश्चिम द्रुतगती मार्गावर (Western Express Highway) भीषण अपघात (Accident) झाला. होंडा सिटी कारने महिंद्रा जीपला मागून धडक दिल्याने अपघात घडला आहे. यामध्ये तीन जण जखमी झाले असून त्यांना नजीकच्या रुग्णालयात दाखल करण्यात आले आहे. आज पहाटे 3.30 च्या सुमारास हा अपघात झाला आहे. दरम्यान, पुढील तपास दिंडोशी पोलिस करत आहेत.

माहितीनुसार, मुंबईच्या पश्चिम द्रुतगती मार्गावर भरधाव वेगात असणारी होंडा सिटी कारने महिंद्रा जीपला मागून धडक दिल्याने महिंद्रा जीप पलटी झाली. जीपमध्ये चार जण प्रवास करत होते. यातील तिघांना गंभीर दुखापत झाली असून त्यांना नजीकच्या रुग्णालयात उपचाराकरीता दाखल करण्यात आले. तर, होंडा सिटी कारचेही मोठे नुकसान झाले आहे.

जीपच्या मालकाच्या म्हणण्यानुसार, तो प्रवाशांना घेऊन बोरिवलीच्या दिशेने जात होता, तेव्हा दिंडोशीजवळ होंडा सिटीने जीपला धडक दिली.