पंतप्रधान मोदींविषयी एक धक्कादायक माहिती समोर आली आहे. मोदींवर होणाऱ्या हल्ल्याचा कट बिहार पोलिसांनी उधळून लावला आहे. पाटण्यातून दोन दहशतवाद्यांना अटक करण्यात आली असून यातील एकजण माजी पोलीस अधिकारी असल्याची माहिती आहे.
या कटानुसार भारताला २०४७ पर्यंत इस्लामिक राष्ट्र बनवण्याचा कट रचला जात होता. याचाच भाग म्हणून पंतप्रधान मोदींना १२ जुलैच्या दौऱ्यात लक्ष्य करण्याच्या कटाचाही समावेश होता. अटक केलेल्या दोन दहशतवाद्यांची नावं अथर परवेज व मोहम्मद जलालुद्दीन अशी आहेत.
पंतप्रधान मोदींच्या दौऱ्याच्या पार्श्वभूमीवर संशयित दहशतवाद्यांचं १५ दिवसांचं प्रशिक्षण फुलवारी शरिफ येथे झालं. त्यांनी ६ व ७ जुलैला पंतप्रधान मोदींवर हल्ला करण्याचा कट रचण्यासाठी बैठक घेतली. याची माहिती मिळताच लगेच त्याठिकाणी पोहचून पोलिसांनी ११ जुलैला फुलवारी शरिफ येथे धाड टाकली. यावेळी पोलिसांना घटनास्थळावरून काही कागदपत्रे मिळाली. यात ‘२०४७ पर्यंत भारत एक इस्लामिक राष्ट्र’ नावाचे कागदपत्र सापडले. याशिवाय २५ पीएफआय पॅम्प्लेटही पोलिसांना मिळाली आहे.