Devendra Fadnavis On Uddhav Thackeray : निवडणूक आयोग पक्षपातीपणा करतोय. मतदान केंद्रात बसलेल्या निवडणूक आयोगाच्या प्रतिनिधींकडून खूप दिरंगाई केली जात आहे. तीन-चारवेळा नावं तपासली जात आहेत. ज्येष्ठ मतदारांना खूप त्रास झाला आहे, असं म्हणत उद्धव ठाकरेंनी निवडणूक आयोगावर टीका केली होती. अशातच राज्याचे उपमुख्यमंत्री देवेंद्र फडणवीस यांनी ट्वीट करत ठाकरेंना प्रत्युत्तर दिलं आहे.

उद्धव ठाकरेंवर टीका करत देवेंद्र फडणवीस ट्वीटरवर काय म्हणाले?

मुंबईत संथ गतीने मतदान होत असल्याची तक्रार सर्वप्रथम आम्हीच आयोगाकडे केली. आता मात्र, नेहमीप्रमाणे उद्धव ठाकरे यांनी त्यांचे रडगाणे सुरु केले आहे. पराभव समोर स्पष्ट दिसत असताना त्यांनी सवयीप्रमाणे मोदीजींवर आरोप करणे प्रारंभ केले आहे. 4 जूननंतरच्या स्थितीला सामोरे जाण्याची पार्श्वभूमी ते आताच तयार करीत आहेत.

निवडणूक प्रक्रियेतील अधिकाऱ्यांना धमक्याही दिल्या जात आहेत. माझी तमाम मुंबईकरांना विनंती आहे की, मतदान केंद्रावर जा आणि मोठ्या संख्येने मतदान करा. 6 वाजले तरी जितके लोक आतमध्ये असतील, त्या प्रत्येकाला मतदान करता येते. त्यामुळे मतदानाचा आपला हक्क बजावल्याशिवाय राहू नका.