Dahi Handi 2025 : श्रावण महिन्याच्या अष्टमी तिथीला श्रीकृष्ण जन्माष्टमीचा सोहळा पार पडतो. दुसऱ्याच दिवशी म्हणजे नवमीला महाराष्ट्र आणि गुजरातसह अनेक ठिकाणी उत्साहाचा, जल्लोषाचा सण दहीहंडी साजरा होतो. यंदा हा उत्सव २७ ऑगस्ट रोजी मंगळवारी रंगणार असून गल्लीबोळांपासून मोठ्या मैदानांपर्यंत गोविंदांच्या घोषणा, ढोल-ताशांचा गजर आणि जल्लोषाचे सूर गुंजतील.
हा सण श्रीकृष्णाच्या बालपणीच्या नटखट लीलांची आठवण म्हणून साजरा केला जातो. श्रीमद्भागवत गीतेतील वर्णनानुसार, बाळकृष्णाला लोणी, दही, दूध यांची विलक्षण आवड होती. गोपिकांनी लोणी लपवून ठेवले तरीही कान्हा आपल्या मित्रांच्या मदतीने मानवी पिरॅमिड रचून उंचावर ठेवलेली हंडी फोडायचा. या गोड, खोडकर प्रसंगाचे स्मरण म्हणून दहीहंडीची परंपरा रूढ झाली.
दहीहंडीच्या दिवशी मातीच्या मडक्यात दही, लोणी, मिठाई, फळे भरून ती उंच ठिकाणी टांगली जाते. विविध गोविंदा पथके, मुलं-मुली मिळून थरांवर थर चढवत मानवी मनोरा तयार करतात. सर्वात वरचा गोविंदा आपला तोल सांभाळत हंडी फोडतो, आणि खाली उभा असलेला जनसमुदाय आनंदाने जल्लोष करतो. हंडी फोडणाऱ्या पथकांना रोख रक्कम, भेटवस्तू आणि सन्मानपत्र देऊन गौरवले जाते.
मुंबईसह महाराष्ट्रात हा उत्सव मोठ्या प्रमाणावर साजरा होतो.अनेक महिला पथकेही यामध्ये सहभागी होऊन धाडसाचे दर्शन घडवतात. चित्रपटसृष्टीतील कलाकार, राजकीय नेते आणि नामांकित व्यक्तिमत्वे या सोहळ्याला उपस्थित राहून तरुणांना प्रोत्साहन देतात.
दहीहंडी हा फक्त खेळ किंवा परंपरा नाही, तर तो एकता, टीमवर्क, धाडस आणि श्रीकृष्णाच्या आनंदी, बंधुत्वाच्या संदेशाचा उत्सव आहे. त्यामुळे प्रत्येक वर्षी जन्माष्टमीच्या दुसऱ्या दिवशी उंचावर टांगलेली हंडी आणि तिला फोडण्यासाठी झगडणारा गोविंदा हा महाराष्ट्राच्या संस्कृतीचा अविभाज्य भाग ठरतो.