मनसेच्या आक्रमक आंदोलनशैलीला अनुसरून पुन्हा एकदा पक्षाचा एक नेता चर्चेत आला आहे. महाराष्ट्र नवनिर्माण सेनेचे पनवेल तालुक्यातील प्रमुख नेते योगेश चिले यांना आज सकाळी पनवेल तालुका पोलिसांनी अटक केली आहे. नाईट रायडर्स या डान्सबारवर करण्यात आलेल्या तोडफोड प्रकरणी ही कारवाई करण्यात आली आहे.
मिळालेल्या प्राथमिक माहितीनुसार, पनवेलमधील नाईट रायडर्स बारमध्ये बेकायदेशीर वर्तन, अश्लील कार्यक्रम आणि सामाजिक वातावरण बिघडवणाऱ्या प्रकारांवर संतप्त होऊन मनसेच्या कार्यकर्त्यांनी बारमध्ये तोडफोड केली होती. या प्रकाराचा व्हिडीओ सोशल मीडियावर व्हायरल झाला होता. त्यानंतर पोलिसांनी तपास सुरू करत योगेश शिल्ले यांना अटक केली.
मनसे नेहमीच मुंबई, ठाणे, पनवेल परिसरातील अशा डान्सबार आणि अवैध धंद्यांच्या विरोधात आक्रमक भूमिका घेत आलेली आहे. या पार्श्वभूमीवर मनसेच्या स्थानिक कार्यकर्त्यांनी हा बार बंद करण्यासाठी हे पाऊल उचलल्याचं बोललं जात आहे. योगेश चिले यांच्यावर भारतीय दंड संहितेनुसार सार्वजनिक मालमत्तेचं नुकसान, गैरकृत्य आणि कायदा-सुव्यवस्थेचा भंग करण्याचे आरोप लावण्यात आले आहेत. सध्या त्यांना पोलिस कोठडीत ठेवण्यात आले आहे आणि पुढील चौकशी सुरू आहे.
या अटकेनंतर महाराष्ट्र नवनिर्माण सेनेत काहीसं संतप्त वातावरण असून, पक्षाच्या कार्यकर्त्यांनी योगेश चिले यांच्या पाठीशी ठामपणे उभं राहण्याची भूमिका घेतली आहे. मनसेच्या स्थानिक नेतृत्वाने पोलिस कारवाईवर सवाल उपस्थित करत, "बेकायदेशीर बार पाठीशी घालणाऱ्यांवर कारवाई का होत नाही?" असा प्रश्न उपस्थित केला आहे. एकूणच, या घटनेमुळे पुन्हा एकदा डान्सबार आणि अश्लीलतेविरोधातील मनसेची मोहीम चर्चेत आली असून, पनवेल परिसरात राजकीय वातावरण तापण्याची शक्यता निर्माण झाली आहे.