पुणे जमीन घोटाळा प्रकरणाला नवी वळण देत सामाजिक कार्यकर्त्या आणि भ्रष्टाचारविरोधी आंदोलनातील आघाडीचे चेहरे असलेल्या अंजली दमानिया यांनी मोठा दावा केला आहे. त्यांनी स्पष्ट शब्दांत सांगितले की त्यांच्या कडे या घोटाळ्याशी संबंधित महत्त्वपूर्ण दस्तऐवजी पुरावे आहेत आणि ते लवकरच खरगे समितीकडे सादर करण्यात येणार आहेत.
दमानिया म्हणाल्या, “माझ्याकडील पुरावे मी खरगे समितीला देणार आहे. हे सर्व पुरावे मी अनेक वर्षे जपून ठेवले आहेत. आता वेळ आली आहे की लोकांना सत्य कळलं पाहिजे.” त्या पुढे म्हणाल्या की हा खुलास्यांचा प्रवास एका दिवसात संपणारा नाही; तर “मी हळूहळू खुलासे करणार” अशा शब्दांत त्यांनी सूचित केले की पुढील काही दिवसांत आणखी मोठे बॉम्ब फुटू शकतात.
दमानियांच्या या वक्तव्यामुळे राजकीय वर्तुळात खळबळ माजली असून या प्रकरणाचे पडसाद दिल्लीपर्यंत जाण्याची शक्यता वर्तवली जात आहे. राजकीय क्षेत्रात आधीच सुरू असलेल्या आरोप-प्रत्यारोपांच्या भोवऱ्यात दमानियांच्या नव्या वक्तव्यामुळे पुणे जमीन घोटाळा प्रकरणाला नवं वळण मिळालं आहे. आगामी दिवसांत खरगे समितीची भूमिका, दमानिया सादर करणार असलेले दस्तऐवज आणि त्यानंतर होणाऱ्या कारवाईकडे संपूर्ण राज्याचे लक्ष लागून राहणार आहे.