मोठ्या जल्लोषात दरवर्षी बाप्पाच आगमन मुंबईत तसेच गावा गावात केलं जात. यावर्षी देखील मोठ्या गाजावाजात ठिकठिकाणच्या बाप्पाचे आगमन पार पडले आहे. गणपती आगमनादरम्यान गणेश भक्तांची देखील मोठी गर्दी पाहायला मिळाली. तर अनेक ठिकाणी बाप्पासाठी आकर्षक अशी सजावट आणि देखावा पाहायला मिळत आहे. अनेक अशा गणपती बाप्पाच्या अनोखा कथा देखील तितक्याच प्रसिद्ध आहेत. असाच एक बाप्पा आहे सांगली जिल्ह्यातील मिरज तालुक्यातील गुंडेवाडी या गावातला, हा बाप्पा झाडावरचा बाप्पा म्हणून ओळखला जातो.
सांगली जिल्ह्यातील मिरज तालुक्यातील गुंडेवाडी या गावात गेली 15 वर्षे झाली वडाच्या झाडावर गणरायाची स्थापना केली जाते. गणेशोत्सव साजरा करतं असताना जागा नसल्याने झाडावरच गणपतीची स्थापना केली जाते. झाडे न तोडता झाडावरच गणरायाची स्थापना करून मनोभावे त्याची पुजा केली जाते. तसेच वृक्षतोड न करण्याचा संदेश देखील याठिकाणी दिला जातो. या गावातील नागरिक सुरेश सुतार यांच्या डोक्यातील ही कल्पना आहे.
त्यांच्या मनात असं आलं होतं की आपण पर्यावरण पुरक बाप्पाची स्थापना केली पाहिजे आणि तेव्हापासून 2009 साली त्यांनी झाडावर गणपतीची स्थापना करण्याचा निर्णय घेतला. त्यांच्या या निर्णयाला गावकऱ्यांनी देखील साथ दिली आणि एक गाव एक गणपती असा निश्चय केला आणि तेव्हापासून आत्तापर्यंत हा बाप्पा झाडावरचा बाप्पा म्हणून ओळखला जातो.