थोडक्यात बातमी वाचण्यासाठी खाली स्क्रोल करा...

उत्तर प्रदेशातील कौशांबी जिल्ह्यातील मंझनपुर परिसरात एका चित्रपटाला लाज वाटेल अशी धक्कादायक घटना समोर आली आहे. एका महिलेने आपल्या ४५ वर्षीय पतीची प्रियकराच्या मदतीने हत्या करून त्याचा मृतदेह लपवला. काही दिवसांनंतर तीच महिला प्रियकराच्या दुसऱ्या लग्नाच्या वरातीत पोहोचली आणि तिथे निर्लज्जपणे नाचली. या घटनेने स्थानिक पातळीवर खळबळ उडाली असून पोलिसांनी दोघांनाही अटक केली आहे.

या प्रकरणाची माहिती अशी आहे की, मंझनपुर परिसरातील एका महिलेचे गावातीलच एका तरुणाशी प्रेमसंबंध होते. मात्र, तिच्या घरच्यांनी तिचे लग्न ४५ वर्षीय व्यक्तीशी लावून दिले. लग्नानंतरही तिचे प्रियकराशी संबंध कायम होते. पती हे दोघांच्या नात्यात अडथळा ठरत असल्याने त्यांनी पतीला कायमचे संपवण्याचा पूर्वनियोजित कट रचला. प्रियकराच्या साथीने महिलेने पतीची हत्या केली आणि पुरावा नष्ट करण्यासाठी मृतदेह लपवून ठेवला.

काही दिवसांनी महिलेचा प्रियकर दुसऱ्या मुलीशी लग्न करत असल्याचे समजल्यानंतर ती चक्क त्याच्या वरातीत हजर झाली आणि तिथे मनसोक्त नाचू लागली. हा प्रकार पाहून उपस्थितांना आश्चर्याचा धक्का बसला, पण कोणालाही पतीच्या हत्येशी तिचा संबंध असल्याचा संशय आला नाही.

महिलेचा पती अनेक दिवस बेपत्ता असल्याने कुटुंबीयांनी पोलिसांत तक्रार दाखल केली. तपासादरम्यान पोलिसांना महिलेच्या प्रेमसंबंधांची माहिती मिळाली. महिलेने गुन्हा कबूल केला आणि सांगितले की, प्रियकराच्या मदतीने तिने पतीचा खून केला. पोलिसांनी आरोपी प्रियकराला लग्नाच्या दुसऱ्याच दिवशी अटक केली. त्याची नवी पत्नी सासरी वाट पाहत होती, तर तो पोलिस स्टेशनमध्ये होता.

पोलिसांनी दिलेल्या माहितीनुसार, हत्येनंतर महिला प्रियकराशी लग्न करण्याचा विचार करत होती, पण त्याने धोका देऊन दुसऱ्या मुलीशी लग्न केले. याचा राग मनात धरून त्याला धडा शिकवण्यासाठी ती वरातीत नाचायला गेली होती. पोलिसांनी दोघांवर खुनाचा गुन्हा दाखल केला असून तपास सुरू आहे. या घटनेमुळे कौशांबीतील सामाजिक वर्तुळातून संताप व्यक्त केला जात आहे आणि पोलिसांना न्याय मिळावा अशी मागणी होत आहे.