पुणे, २३ ऑक्टोबर २०२३: महाराष्ट्र क्रिकेट असोसिएशन (MCA) ला त्यांच्या महाराष्ट्रातील क्रिकेट विकसित करण्याच्या मोहीमेला बळ मिळाले आहे, कारण त्यांनी सोमवारी २०२३-२४च्या हंगामाची नवीन जर्सी लॉन्च करताना पुनित बालन ग्रुप (PBG) आणि माणिकचंद ऑक्सीरिच यांना त्यांचे मुख्य भागीदार म्हणून घोषित केले.

देशातील आश्वासक क्रीडा प्रतिभेचे संगोपन करणे आणि क्रीडा संस्कृतीला चालना देण्यासाठी वचनबद्ध राहणे, हे PBG चे उद्दिष्ट आहे. ते क्रीडा क्षेत्रातील जवळपास ६० प्रतिभावान खेळाडूंना समर्थन करत आहेत. आता पीबीजी आणि माणिकचंद ऑक्सीरिच हे एमसीए सोबत राज्यात क्रिकेटला पुढील स्तरावर नेण्यासाठी, राज्यातील दुर्गम भागात खेळाचा प्रचार आणि विकास करण्यासाठी काम करणार आहेत.

“पुनित बालन ग्रुप आणि माणिकचंद ऑक्सीरिच यांच्यासोबतचा करार पुढील पाच हंगामांसाठी प्रति हंगाम ५ कोटी रुपयांचा आहे. पुनित बालन ग्रुप आणि ऑक्सीरिच यांच्याशी झालेल्या करारामुळे एमसीएला राज्यातील दुर्गम भागात पायाभूत सुविधांचा विकास, कल्याणकारी योजना आणि तळागाळातील विकास यासारख्या चांगल्या सुविधा उपलब्ध करून देण्यास मदत होईल. तरुण खेळाडूंची प्रतिभा ओळखणे आणि त्यांना तयार करणे यावर लक्ष केंद्रित केले जाईल,” असे एमसीएचे अध्यक्ष रोहित पवार यांनी सोमवारी पत्रकार परिषदेत सांगितले.

“पुनित बालन ग्रुप आणि माणिकचंद ऑक्सीरिच हे पुण्यातील प्रतिष्ठित व्यावसायिक गट आहेत. त्यांचे क्रीडा क्षेत्रात योगदान आहे. त्यांनी विविध क्रीडा प्रकारातील खेळाडूंना पाठिंबा दिला आहे आणि त्यांची स्वप्ने पूर्ण करण्यात मदत केली आहे. महाराष्ट्र क्रिकेटच्या भल्यासाठी आम्ही त्यांच्यासोबत सहकार्य करण्याचा निर्णय घेतला आहे,” असे पवार पुढे म्हणाले.

ही संघटना राज्यासाठी तसेच देशासाठी पुढील क्रिकेट उदयोन्मुख खेळाडूंना चांगल्या सुविधा पुरविण्यासाठी मदत करेल.

असोसिएशनबद्दल बोलताना, पुनित बालन ग्रुपचे अध्यक्ष आणि व्यवस्थापकीय संचालक पुनित बालन म्हणाले की, “आमच्या क्रीडा विभागाद्वारे, आम्हाला विविध क्रीडा प्रकारांतील खेळाडूंना पाठिंबा द्यायचा आहे आणि आम्हाला महाराष्ट्र क्रिकेटला पाठिंबा देताना आनंद होत आहे. आम्ही आमच्या क्रीडा विभागामार्फत ६० खेळाडूंना स्वतंत्रपणे पाठिंबा देत आहोत. आम्ही त्यांना सर्वोच्च पातळीवर भारताचे प्रतिनिधित्व करताना पाहू इच्छितो आणि या प्रक्रियेत त्यांना पाठिंबा देण्यासाठी आम्ही वचनबद्ध आहोत. रोहित पवार यांच्या नेतृत्वाखाली महाराष्ट्र क्रिकेटमध्ये आम्हाला तीच क्षमता दिसत आहे.”

कराराचा एक भाग म्हणून, पुनित बालन ग्रुपचा लोगो हा महाराष्ट्राच्या पुरुष व महिलांच्या सर्व वयोगटातील संघांच्या शर्टच्या समोर दिसेल, तर शर्टच्या स्लीव्हवर माणिकचंद ऑक्सिरिच लोगो असेल.

एमसीएचे सचिव शुभेंद्र भांडारकर, एमसीएचे सर्वोच्च परिषद सदस्य - विनायक द्रविड, सुहास पटवर्धन, राजू काणे, रणजित खिरीड, कमलेश पिसाळ, सुशील शेवाळे, सुनील मुथा, अशोक वाळे, कल्पना तापकीर आणि सीओओ अजिंक्य जोशी हे देखील यावेळी उपस्थित होते.

रोहित पवार यांनी कॉर्पोरेट हाऊसेसना लातूर आणि धुळे येथे एमसीए सुविधा विकसित करण्यासाठी आमंत्रित केले आणि योग्य रकमेसह नामकरण हक्क विकण्याचा प्रस्ताव दिला.