2008 मधील राज ठाकरे यांच्या अटकेवेळी झालेल्या आंदोलनाप्रकरणी आज वांद्रे कोर्टात सुनावणी पार पडली. रेल्वे भरती परीक्षेदरम्यान उत्तर भारतीय विद्यार्थ्यांविरोधात झालेल्या या आंदोलनात तब्बल 89 मनसैनिकांवर गुन्हे दाखल करण्यात आले होते.

आजच्या सुनावणीला सर्व 89 आरोपींना हजर राहण्याचे आदेश कोर्टाने दिले होते. यावेळी सध्या ठाकरेंच्या शिवसेनेत असलेले मात्र त्यावेळी मनसेत असलेले अखिल चित्रे आणि आता मनसेतून भाजपमध्ये गेलेले हाजी अराफत शेख न्यायालयात उपस्थित होते. मात्र, वारंवार तारखांना दांडी मारणाऱ्या आणि हजर न राहणाऱ्या आरोपींवर न्यायालयाने तीव्र नाराजी व्यक्त केली आहे.

कोर्टाने अशा आरोपींना 500 रुपयांचा दंड ठोठावला असून ज्यांच्यावर वॉरंट बजावण्यात आले होते, त्यांनी न्यायालयात हजर राहून ते रद्द करून घेतले आहे. आता या प्रकरणाची पुढील सुनावणी 2 एप्रिल रोजी होणार आहे.