गडचिरोली: जिल्ह्यातील भामरागड तालुक्यातील दुर्गम नक्षलग्रस्त असलेल्या कृष्णार येथील एका २३ वर्षीय युवकाचा क्षयरोगामुळे मृत्यू झाल्याने आरोग्य विभागाच्या कार्यप्रणालीवर प्रश्न निर्माण करण्यात येत आहे.
१७ जुलै रोजी गणेश तेलामीची प्रकृती ढासळल्याने गंभीर अवस्थेत हेमलकसा येथे त्याला भरती करण्यात आले होते. हेमलकसा येथे उपचारही सुरू होता मात्र तीन दिवसानंतर २० जुलैला उपचारादरम्यान गणेशचा मृत्यू झाला. दरम्यान भामरागड येथे वेळेवर शववाहिका उपलब्ध नसल्याने शव दुचाकीवर खाटेला बांधून गावी नेण्यात आल्याने संताप व्यक्त करण्यात येत आहे.
हा प्रकार लक्षात येताच खडबडून जागे झालेल्या प्रशासनाने शववाहिका पाठवून प्रकरण दडपण्याचा प्रयत्न केला. पण तोपर्यंत प्रेत गावात पोहोचले होते. भामरागड इथे रुग्णांसाठी मोबाइल बाईकसुद्धा पुरवल्या गेल्या आहेत. मात्र वेळेवर चालक उपलब्ध होत नसल्यामुळे या बाईकचा रुग्णांना फारसा उपयोग होत नाही.