उद्धव ठाकरेंचे उत्कृष्ट मार्गदर्शक संजय राऊत यांना स्वप्न पडल्यामुळे त्यांनी उद्धव ठाकरेंना स्वबळावर निवडणूक लढवण्याच्या सूचना केल्या असतील, असं खोचक विधान गुलाबराव पाटलांनी केलं आहे. तर ठाकरेंची शिवसेना आणि भाजप एकत्र येण्याबाबत आमचं काही म्हणणं नाही, पण त्यावेळी भाजपाला मदत करण्यासाठी आम्ही उठाव केला याचा विचार भाजप करेल, असंही पाटलांनी म्हटलं आहे.
गुलाबराव पाटलांचा राऊतांना खोचक टोला
याचपार्श्वभूमीवर गुलाबराव पाटील म्हणाले की, उद्धव ठाकरेंचे उत्कृष्ट मार्गदर्शक संजय राऊत यांना स्वप्न पडल्यामुळे त्यांनी उद्धव ठाकरेंना स्वबळावर निवडणूक लढवण्याच्या सूचना त्यांनी केल्या असतील. कदाचित असं स्वप्न त्यांना मागच्या काळामध्ये पडलं असतं तर आज शिवसेनेची अशी वाताहात झाली नसती, असं गुलाबराव पाटील म्हणाले आहेत.
ठाकरे-भाजप एकत्र येण्याच्या चर्चांवर पाटलांचं विधान
तसेच पुढे गुलाबराव पाटील म्हणाले की, शिवसेना भाजप एकत्र येण्याबद्दल वाद नाही व त्याबद्दल आमचं काही म्हणणंही नाही .. पण त्यांनी ज्या काळात भाजपाला मदत करायला पाहिजे होती, त्या काळात भाजपच्या विचाराला हे सोडून चालले गेले... त्या काळात भाजपाला मदत करण्यासाठी आम्ही उठाव केला याचा विचार भाजप करेल असं मला वाटतं... जो पडतीच्या काळामध्ये आपल्या सोबत असतो तो आपला भाऊ, त्यामुळे आता युती होईल किंवा नाही हा विषय जरी असला तरी भाजप शिवसेना जवळ करेल असं मला वाटत नाही... असं वक्तव्य गुलाबराव पाटील यांनी केलं आहे.