'या' देशात होणार Asia Cup; BCCI प्रमुख सौरव गांगुली यांची मोठी घोषणा
BCCI प्रमुख सौरव गांगुली यांनी मोठी घोषणा केली आहे. ती म्हणजे आता एशिया कप श्रीलंकेत नव्हे तर संयुक्त अरब अमिराती (यूएई) येथे होणार आहे, जो आधी श्रीलंकेत होणार होता. श्रीलंका सध्या आर्थिक संकटाचा सामना करत आहे आणि अशा परिस्थितीत या देशात एवढी मोठी स्पर्धा आयोजित करणे शक्य नाही, असे त्यांनी म्हटले आहे. "आशिया कप युनायटेड अरब अमिराती (यूएई) येथे होणार आहे कारण हे एकमेव ठिकाण आहे जेथे पाऊस पडत नाही," असे गांगुली यांनी सांगितले आहे.
2022 आशिया कप हा 1984 पासून शारजाह येथे सुरू झालेल्या स्पर्धेचा 15 वा हंगाम असेल. 27 ऑगस्ट ते 11 सप्टेंबर या कालावधीत होणाऱ्या आशिया कप 2022 मध्ये सहा संघ सहभागी होणार आहेत. श्रीलंका, गतविजेते भारत, पाकिस्तान, बांगलादेश आणि अफगाणिस्तान याआधीच स्पर्धेसाठी पात्र ठरले आहेत. या स्पर्धेला 20 ऑगस्टपासून सुरुवात होणार आहे.
देशातील आर्थिक आणि राजकीय संकटामुळे बोर्ड आशिया कप T20 च्या आगामी आवृत्तीचे आयोजन करण्याच्या स्थितीत नाही. तसेच सध्याच्या संकटामुळे श्रीलंका क्रिकेटने अलीकडेच श्रीलंका प्रीमियर लीगचा तिसरा टप्पा पुढे ढकलला होता.
