थोडक्यात बातमी वाचण्यासाठी खाली स्क्रोल करा...

मुलुंड येथील मेट्रो बांधकाम स्थळी शनिवारी घडलेल्या भीषण दुर्घटनेनंतर उपमुख्यमंत्री एकनाथ शिंदे यांच्या अध्यक्षतेखाली मुंबई महानगर प्रदेश विकास प्राधिकरणाची (MMRDA) बैठक आज दुपारी २ वाजता होणार आहे. या बैठकीत अपघातप्रकरणी सुरक्षा सुधारणांवर आढावा घेतला जाईल तसेच मोठ्या पायाभूत सुविधा प्रकल्पांच्या अर्थसंकल्पावर चर्चा अपेक्षित आहे.

मुलुंडमधील मेट्रो लाईन ४ च्या बांधकामादरम्यान पॅरापेटचा भाग कोसळून एकाचा मृत्यू आणि तीन जण जखमी झाल्यानंतर सरकारने तात्काळ कारवाई सुरू केली आहे. उपमुख्यमंत्री शिंदे यांनी एक्झिक्युटिव्ह इंजिनियर सत्यजित साळवे यांना निलंबित करण्याचे आदेश दिले असून, लुई बर्गर कंपनीला १ कोटी आणि मिलन इंफ्रा कंपनीला ५ कोटी रुपयांचा दंड ठोठावला आहे. MMRDA ने मृतकाच्या कुटुंबाला १५ लाखांची मदत जाहीर केली असून, संपूर्ण कॉरिडॉरचे सेफ्टी ऑडिट करण्यात आले आहे.

या बैठकीत मुलुंड अपघाताचे तपशीलवार विश्लेषण होईल आणि भविष्यात अशा दुर्घटणा टाळण्यासाठी सुरक्षा नियमांचे काटेकोर पालन, स्ट्रक्चरल ऑडिट आणि जबाबदारी निश्चित करण्यावर भर दिला जाईल. तसेच MMRDA च्या अर्थसंकल्पात मेट्रो, किनारी कनेक्टिव्हिटी आणि इतर मोठ्या प्रकल्पांसाठी निधी वाटपावर चर्चा होईल, ज्यामुळे मुंबई महानगर प्रदेशाच्या विकासाला गती मिळेल.