थोडक्यात बातमी वाचण्यासाठी खाली स्क्रोल करा...
मुंबईतील गर्दीच्या लोकल प्रवासाला लवकरच दिलासा मिळणार आहे. महिन्याभराच्या प्रतीक्षेनंतर पश्चिम रेल्वे आणि मध्य रेल्वेवर प्रत्येकी एक नवीन एसी लोकल ट्रेन धावण्यास सुरुवात होणार आहे. ही नवी अंडरस्लंग मेधा वातानुकूलित ट्रेन चेन्नईतील इंटिग्रल कोच फॅक्टरीमधून रवाना झाली असून, सध्या ती चेन्नईच्या विल्लीवक्कम यार्डमध्ये दाखल झाली आहे. लवकरच मुंबईत पोहोचून सेवा देण्यासाठी तत्पर राहणार आहे, असे पश्चिम रेल्वेच्या अधिकाऱ्यांनी सांगितले.
मुंबईतील लोकल ट्रेन ही शहराच्या रक्तवाहिनी सारखी आहे, पण गर्दीमुळे प्रवाशांचा प्रवास मात्र त्रासदायक झाला आहे. यावर उपाय म्हणून एसी लोकल ट्रेन सुरू करण्यात आल्या. मात्र, सध्याच्या एसी लोकलवरही प्रचंड गर्दी असते. अतिरिक्त फेऱ्या नसल्याने गर्दी नियंत्रणात ठेवणे कठीण जाते, तसेच ब्रेकडाउन आणि नियमित देखभाल व्यवस्थापनही आव्हानात्मक झाले आहे. नवीन ट्रेन दाखल झाल्यानंतरही ती त्वरित चालवली जाणार नाही. काही दिवसांच्या चाचण्या आणि तयारीनंतरच ती वेळापत्रकात सामील होईल.
या नवीन एसी लोकलची खासियत म्हणजे अंडरस्लंग डिझाईन. यात इलेक्ट्रिकल सिस्टिमसह प्रमुख उपकरणे कोचच्या आत न ठेवता मजल्याखाली बसवली जातात. परिणामी, कोचमधील जागा मोकळी राहते आणि आसनक्षमता वाढते. सामान्य ट्रेनची क्षमता १,०२८ असताना ही ट्रेन १,११६ प्रवाशांना सोईस्करपणे वाहून नेईल. यामुळे प्रवाशांना अधिक आरामदायी प्रवास मिळेल आणि गर्दी कमी होण्यास मदत होईल.
मुंबईकरांसाठी ही आनंदाची बातमी आहे. दररोज लाखो प्रवासी लोकलवर अवलंबून असतात. अतिरिक्त एसी फेऱ्या सुरु झाल्याने विशेषतः सुट्टी आणि कार्याकालीन वेळेत गर्दीवर नियंत्रण मिळेल. रेल्वे प्रशासनाने याबाबत जलद हालचाली केल्या असून लवकरच मुंबईकरांना फायदा होईल. पश्चिम आणि मध्य रेल्वेवर एकत्रितपणे या ट्रेनमुळे शहराच्या वाहतुकीला नवसंजन मिळेल.
मध्य व पश्चिम रेल्वेवर प्रत्येकी एक नवी एसी लोकल दाखल होणार
अंडरस्लंग डिझाइनमुळे प्रवासी क्षमता वाढणार
चाचणीनंतरच एसी लोकल नियमित सेवेत दाखल होणार
गर्दी कमी करून प्रवाशांना अधिक आरामदायी प्रवास मिळणार