थोडक्यात बातमी वाचण्यासाठी खाली स्क्रोल करा...
अमरावती जिल्ह्यातील दहा नगरपरिषद आणि दोन नगरपंचायत निवडणुकांच्या निकालाची उत्सुकता आता शिगेला पोहोचली आहे. उद्या सकाळी दहा वाजल्यापासून तालुक्याच्या ठिकाणी मतमोजणी प्रक्रिया सुरू होणार असून, जिल्ह्यातील एकूण मतमोजणीची पूर्ण तयारी झाली आहे.
सर्वात मोठी नगरपालिका असलेल्या अचलपूरमध्ये नगराध्यक्षपदाचा निकाल २० व्या फेरीअखेर कळणार असल्याने दुपारी ३ वाजता तेथील नवे नगराध्यक्ष कोण हे स्पष्ट होईल. त्याचबरोबर, नांदगाव खंडेश्वर, धामणगाव रेल्वे आणि शेंदुरजनाघाट या ठिकाणी प्रत्येकी तीन फेऱ्यांमध्ये मतमोजणी आटोपणार असल्याने दुपारी १२ वाजता तेथील निकाल जाहीर होतील, असा अंदाज आहे.
या निवडणुकांत भारतीय जनता पार्टी, शिवसेना शिंदे गट, शिवसेना ठाकरे गट, काँग्रेस, राष्ट्रवादी अजित पवार गट, राष्ट्रवादी शरद पवार गट आणि प्रहार संघटना यांनी संपूर्ण स्वबळावर लढवल्या. धामणगाव रेल्वे नगरपरिषदेत भाजपाकडून आमदार प्रताप अडसड यांच्या भगिनी अर्चना रोठे नगराध्यक्षपदासाठी रिंगणात होत्या.
अंजनगाव सुर्जी नगरपरिषदेत ठाकरे गटाकडून आमदार गजानन लवटे यांचा मुलगा यश लवटे लढले. धारणी नगरपंचायतीसाठी मुख्यमंत्री देवेंद्र फडणवीस यांनी प्रचारसभा घेतली होती, तर अंजनगाव सुर्जीत उपमुख्यमंत्री एकनाथ शिंदे यांनी प्रचार केला. अमरावती जिल्ह्यात बच्चू कडू यांचीही प्रतिष्ठा पणाला असल्याने सर्व राजकीय पक्षांनी आपली शक्तीप्रदर्शन केले.
जिल्ह्यातील नगरपरिषद आणि नगरपंचायत निवडणुकांत भाजपला सर्वाधिक नगराध्यक्ष पदे मिळण्याची शक्यता आहे. काँग्रेस, शिवसेना आणि राष्ट्रवादी गटांसह इतर पक्षांकडूनही अपेक्षा आहेत. निकालानंतर राजकीय समीकरणे कशी बदलतील यावर सर्वांचे लक्ष केंद्रित आहे.