मुंबई : शिंदे गटाचे नेते संजय शिरसाट यांच्या वक्तव्यानंतर ठाकरे गटाच्या उपनेत्या सुषमा अंधारे आक्रमक झाल्या आहेत. संजय शिरसाटांवर अब्रुनुकसानीच्या दाव्यावर ठाम असल्याचं त्यांनी म्हटलंय. त्या बीड येथे पत्रकार परिषदेत बोलत होत्या. एखाद्या महिलेबद्दल बोलताना त्यांनी लाख वेळा विचार केला पाहिजे, असंही त्यांनी म्हंटले आहे.
संजय शिरसाठ यांच्या वादग्रस्त वक्तव्यानंतर सुषमा अंधारे यांनी परळी मध्ये पत्रकार परिषद घेऊन आपली भूमिका स्पष्ट केली. या पत्रकार परिषदेतून अंधारे यांनी संजय शिरसाठ यांना लक्ष्य केले आहे. शिंदे आणि फडणवीस यांच्यावर विश्वास असून त्याच्या मस्तवाल लोकप्रतिनिधींना किमान आता तरी सुधारवाल आणि त्यांच्यावर योग्य ती कारवाई करावी. मात्र त्यांनी कारवाई नाही केली तरी अब्रू नुकसानीचा दावा करणार असल्याचं त्यांनी यावेळी स्पष्ट केलं.
माझी लढाई लढण्यासाठी मी खंबीर आहे. आणि यासाठी मला काही वेगळ्या गोष्टी करावे लागतील असं वाटत नाही. एखाद्या महिलांबद्दल बोलताना त्यांनी लाख वेळा विचार केला पाहिजे, असे देखील सुषमा अंधारेंनी म्हंटले आहे.
दरम्यान, आम्ही आमची ३८ वर्षे शिवसेनेसाठी घालवली. आता तुम्ही येऊन आम्हाला मार्गदर्शन करताय. सत्तार भाऊ माझेच भाऊ आहेत, भुमरे भाऊ पण माझेच भाऊ आहेत. ती बाई म्हणते सगळेच माझे भाऊ आहेत. मात्र तिने काय-काय लफडी केली आहे, हे तिलाच माहित. अरे पण तू आहे तरी कोण? असे संजय शिरसाट यांनी म्हंटले होते.