भारतीय तटरक्षक दलाने समुद्रातील आणीबाणीच्या वेळी दाखवलेली तत्परता आणि शौर्य पुन्हा एकदा सिद्ध झाले आहे. अमेरिकेची 'Sea Angel' ही मोटर याच (नौका) खराब हवामानात अडकल्यानंतर भारतीय दलाने तिचा यशस्वी बचाव केला आहे.
ही घटना 10 जुलै रोजी घडली. दुपारी सुमारे 12.00 वाजता पोर्ट ब्लेअर येथील तटरक्षक नियंत्रण केंद्राला मदतीचा संदेश प्राप्त झाला. ही नौका अंदमान-निकोबार बेटांच्या जवळ, इंदिरा पॉइंटपासून 52 नॉटिकल मैल दक्षिण-पूर्व दिशेला होती. याचमध्ये 2 प्रवासी होते. वाऱ्याचा जोर आणि समुद्रातील खवळलेली स्थिती यामुळे याचचे पाल फाटले होते आणि प्रोपेलरमध्ये काही अडकल्याने ती पुढे जाऊ शकत नव्हती.
संकटाचा इशारा मिळताच MRCC पोर्ट ब्लेअरने आंतरराष्ट्रीय सुरक्षा नेटवर्क (ISN) सक्रिय करत तातडीची कारवाई सुरू केली. आजूबाजूच्या सर्व व्यापारी जहाजांना सतर्क करण्यात आले. तत्काळ मदतीसाठी ICGS Rajveer या जहाजाला दुपारी 2.00 वाजता रवाना करण्यात आले. सायंकाळी 5.30 वाजता Rajveer या याचपर्यंत पोहोचले आणि दोन्ही प्रवाशांशी यशस्वी संपर्क साधण्यात आला. विशेष बाब म्हणजे वाईट हवामान असूनही प्रवासी पूर्णपणे सुरक्षित होते.
सायंकाळी सुमारे 6.50 वाजता 'Sea Angel' याचला दोरीच्या साहाय्याने टो करण्यात आले आणि ICGS Rajveer ने तिला सुरक्षितरित्या Campbell Bay पर्यंत आणले. पुढे 11 जुलै रोजी सकाळी 8.00 वाजता याचला सुरक्षित बंदरात दाखल करण्यात आले.
‘Sea Angel’ ही 27.58 मीटर लांबीची लक्झरी मोटर याच आहे. तिचे निर्माण 1987 मध्ये अमेरिकेतील Panhandle या कंपनीने केले होते. तिची कमाल वेग क्षमता 19.0 नॉट्स असून क्रूझिंग स्पीड 12.0 नॉट्स आहे. याला तीन General Motors डिझेल इंजिन्सद्वारे शक्ती दिली जाते. यामध्ये एकूण 5 स्टेटरूम्स असून, 10 अतिथी राहू शकतात आणि 4 क्रू सदस्य त्यांच्या सेवेकरिता नेमलेले असतात. याचचे एकूण वजन 69.0 टन आहे.
या संपूर्ण कारवाईत भारतीय तटरक्षक दलाने दाखवलेली दक्षता, जलद प्रतिसाद आणि व्यावसायिकता ही कौतुकास पात्र आहे. ही घटना समुद्रातील आपत्कालीन परिस्थितीत भारताच्या तत्पर बचाव यंत्रणेचा उत्तम नमुना ठरते.
हेही वाचा