निसार शेख, रत्नागिरी

शिंदे गटातील शिवसेना नेते रामदास कदम यांनी पुन्हा एकदा ठाकरे गटावर निशाणा साधत खासदार संजय राऊत यांचा पळपुटा असा उल्लेख करत कर्नाटकात जायच्या भीतीने शेपूट का घालताय, असा सवाल उपस्थित केलाय. कालपर्यंत डरकाळी फोडणारे संजय राऊत घाबरले का, याचेच आश्चर्य वाटत असल्याचे रामदास कदम म्हणाले.

खेड तालुक्यातील जामगे येथे आले असता त्यांनी माध्यमांना प्रतिक्रिया देताना केलेले हे वक्तव्य वादग्रस्त ठरण्याची शक्यता वर्तवली जात आहे. मला देखील कर्नाटक न्यायालयाने समन्स काढले होते व मी सुद्धा कर्नाटकात जाऊन आलो. सीमाभागातील मराठी लोकांनी माझे तिथे स्वागत केले आणि माझ्या जामिनासाठी तिथल्याच मराठी लोकांनी मला सहकार्य केले.

त्यामुळे संजयजी तुम्ही घाबरू नका आणि मराठी माणूस पळपुटा आहे असा संदेश देऊ नका, तुम्ही कर्नाटकात जा तेथील मराठी लोक तुमच्या बाजूने ठामपणे उभे राहतील, असा सल्ला देखील रामदास कदम यांनी संजय राऊत यांना दिला आहे.