राज्यपाल भगतसिंह कोश्यारी यांनी केलेल्या वक्तव्यानंतर राजकीय वातावरण चांगलेच तापले आहे. राजकीय वर्तुळातून अनेक प्रतिक्रिया येत आहे. यावरुन उदयनराजे आक्रमक झाले आहेत. त्या पार्श्वभूवर उदयनराजेंनी शिवसन्मानाचा निर्धार केला. आज ते रायगडावर येणार आहेत. शिरकाई, जगदिश्वर मंदिराला अभिवादन केल्यानंतर उदयनराजे शिवभक्तांना संबोधित करणार आहेत. उदयनराजे आज नेमकं काय बोलणार? याकडे सर्वांचं लक्ष लागले आहे.
खासदार उदयनराजे भोसले यांनी शिवसन्मानासाठी ‘चलो रायगड’ अशी हाक दिल्याने हजारो शिवभक्त आणि उदयनराजे समर्थक महाडमध्ये दाखल होत आहेत.संपूर्ण रायगडावर पोलिस बंदोबस्त ठेवण्यात आला असून, प्रशासन सज्ज झाले आहे.
उदयनराजे भोसले यांनी ‘शिवरायांचा अपमान पाहण्यापेक्षा मेलो असतो, तर बरं झालं असतं,’ अशी भावना व्यक्त केली आहे. शनिवारी छत्रपती शिवाजी महाराजांच्या समाधी स्थळावर पुष्पहार अर्पण केल्यानंतर खासदार उदयनराजे आपली भूमिका स्पष्ट करणार आहेत.