Bangladesh Violence: बांगलादेशमध्ये हिंदू व्यक्तीवर हल्ले सुरुच, पेट्रोल टाकून जिवंत जाळण्याचा प्रयत्न

थोडक्यात बातमी वाचण्यासाठी खाली स्क्रोल करा...

बांगलादेशमध्ये गेल्या दोन आठवड्यांपासून अल्पसंख्याक हिंदू समुदायावर सतत हल्ले होत आहेत. मैमनसिंग जिल्ह्यातील चौथ्या हिंदूवर नवीन वर्षाच्या पूर्वसंध्येला जीवघेणा हल्ला झाला. ३१ डिसेंबरच्या रात्री ४० वर्षीय हिंदू व्यापारी खोकन चंद्र दास यांच्यावर जमावाने चाकूने वार करून पेट्रोल ओतून जाळण्याचा प्रयत्न केला. थोडक्यात प्राण वाचवण्यासाठी त्यांनी जवळच्या तलावात उडी मारली.

कानेश्वर युनियनमधील केउरभंगा परिसरात फार्मसी चालवणारे खोकन चंद्र दास रात्री ९ वाजता दुकान बंद करून तिलोईकडे घरी परतत होते. तेव्हा काही गुंडांनी त्यांना अडवले आणि बेदम मारहाण सुरू केली. हल्लेखोरांनी धारधार शस्त्रांनी अनेक वार केले आणि पेट्रोल ओतून पेटवण्याचा प्रयत्न केला. मात्र तलावात उडी मारल्याने ते वाचले. स्थानिकांनी त्यांना वाचवले आणि शरीयतपूर येथील रुग्णालयात दाखल केले. डॉक्टरांनी त्यांची प्रकृती गंभीर सांगितली आहे.

हा हल्ला दोन आठवड्यांत मैमनसिंगमधील चौथा आहे. ३० डिसेंबरला कपड्याच्या कारखान्यात काम करणाऱ्या बजेंद्र बिस्वास यांची नोमान मिया नावाच्या आरोपीने गोळ्या झाडून हत्या केली. १८ डिसेंबरला २७ वर्षीय दीपू चंद्र दास यांची जमावाने बेदम मारहाण करून हत्या केली आणि मृतदेह झाडाला बांधून पेटवला. २४ डिसेंबरला कालीमोहर युनियनच्या हुसेनडांगा भागात अमृत मंडल ऊर्फ सम्राट यांची खंडणी मागण्याच्या आरोपाखाली जमावाने हत्या केली.

या सलग हल्ल्यांमुळे बांगलादेशातील हिंदू समुदायात भीतीचे वातावरण आहे. स्थानिक माध्यमे आणि मानवाधिकार संघटना यावर तात्काळ कारवाईची मागणी करत आहेत, तर आंतरराष्ट्रीय पातळीवरही चिंता व्यक्त होत आहे.