विखे पाटील आणि पवार या दोन कुटुंबीयांमधले राजकीय वाद हे संपुर्ण महाराष्ट्राला माहित आहेत. दोन्ही कुटुंबातले वाद, एकमेकांशी असलेले राजकीय वैर त्याचे काही दिवसांपूर्वी राजकीय वर्तुळातील पडदास या सगळ्या गोष्टी महाराष्ट्राने पाहिल्या आहेत. दरम्यान, काल नगरचे खासदार सुजय विखे पाटील आणि राष्ट्रवादीचे युवा नेते पार्थ पवार यांनी एकाच विमानातून प्रवास केला आणि इम्प्रेस झालेल्या सुजय विखेंनी तो फोटो आपल्या फेसबुकवर शेअर केला आहे.
माजी मंत्री राधाकृष्ण विखे पाटील यांचे चिरंजीव अहमदनगर लोकसभा मतदारसंघाचे खासदार डॉ सुजय विखे पाटील आणि उपमुख्यमंत्री अजित पवार यांचे पुत्र पार्थ पवार यांची काल औरंगाबाद विमानतळावर भेट झाली. सुजय विखे आणि पार्थ पवारांनी एकाच विमानाने प्रवासही केला. औरंगाबाद ते मुंबई असा त्यांचा प्रवास होता. यावेळी त्यांनी एकमेकांसोबत गप्पा मारल्या. काही फोटो देखील काढले.
सुजय विखे पाटलांनी आपल्या ट्विटर अकाऊंटवरुन एक फोटो शेअर केला आहे. या फोटोमध्ये ते पार्थ पवार यांच्यासोबत विमानात बसलेले दिसत आहेत. या फोटोला विखे पाटलांनी कॅप्शनही असेच दिलेले आहे. "सर्व सीमांच्या पलिकडची मैत्री" ( friendship beyond boundaries..!!) असे कॅप्शनही त्यांनी या फोटोंना दिलेले आहे. या फोटोवर अनेकांनी कमेंट्स केल्या आहेत. काही जणांनी या कमेंट्समध्ये आपली मते मांडली आहेत, तर काही जणांनी या दोघांचीही चांगलीच फिरकी घेतली आहे. तर काही कमेंट्समध्ये या दोघांच्या मैत्रीचे कौतुक केले आहे. आता या दोघांच्या या भेटीमुळे राजकीय वर्तुळात चर्चांना उधान आले आहे.