केंद्र सरकारने देशभरातील 13 राज्यातील राज्यपाल आणि उपराज्यपाल यांच्यात बदल केले आहेत. राज्यपाल भगतसिंह कोश्यारी हे महापुरुषांबद्दल अनेक आक्षेपार्ह आणि वादग्रस्त व्यक्तव्यामुळे चर्चेत राहिले होते. मात्र, आज अखेर राज्याच्या राज्यपाल पदावरून पदमुक्त करण्यात आले आहे. त्यांच्या जागी रमेश बैस हे राज्याचे नवे राज्यपाल म्हणून नियुक्त करण्यात आले आहेत. याच नवीन राज्यपालांबाबत सविस्तर माहिती जाणून घ्या.

रमेश बैस हे राज्याचे 14वे राज्यपाल म्हणून नियुक्त होणार आहेत. याआधी ते झारखंडचे राज्यपाल होते. रमेश बैस हे तब्बल सात वेळा खासदार राहिले आहेत. बैस यांचा जन्म 2 ऑगस्ट 1947 मध्ये छत्तीसगढच्या रायपूरमध्ये झाला. 1978 मध्ये सर्वात आधी नगरपालिकेत निवडून गेले होते. यानंतर 1980 ते 1984 मध्ये आमदार म्हणून मध्यप्रदेश विधानसभेत ते निवडून गेले होते. त्यानंतर रायपूर लोकसभा मतदारसंघातून सलग सात वेळा ते खासदार होते. सोबतच त्यांनी अटल बिहारी वाजपेयी यांच्या काळात त्यांनी केंद्रातही राज्यमंत्रीपद भूषवले आहे. त्यानंतर रमेश बैस यापूर्वी झारखंड आणि त्रिपुरा राज्याचे राज्यपाल होते. यासोबतच ते मध्य प्रदेश भाजपचे उपाध्यक्ष देखील होते.

झारखंड सरकार आणि रमेश बैस यांचाही संघर्ष दिसून आला...

रमेश बैस यांनी झारखंड विधानसभेने संमत केलेले 'झारखंड वित्त विधेयक-2022 ' दोन दिवसांपुर्वीच राज्य सरकारकडे परत पाठवले. तिसऱ्यांदाही त्यांनी हे विधेयक परत पाठवले. यामुळे झारखंड सरकार आणि राज्यपाल असा संघर्ष दिसून आला.